كود سبور//
مذيع كولومبي مشات له الخدمة ديالو فالإذاعة اللي خدام فيها من بعدما دافع على الدولي المغربي أشرف حكيمي نجم باريس سان جيرمان الفرنسي المتهم فقضية اغتصاب بفرنسا.
المذيع الكولومبي أوسكار رينتريا اللي كان خدام بإذاعة “كاراكول” الكولومبية، قال فحوار له مع جريدة “سيمانا”: “بزاف ديال اللاعبين تقدمت ضدهم شكايات وكاين اللي فيهم تعاقب وكاين اللي لا، والرأي ديالي خاص يحترم بحال جميع الآراء”.
وكمل المذيع الكولومبي وقال: “تفاجأت بقرار الإذاعة كيفما تفاجأ به بزاف الناس، ولكنه قرار صدر وكنتقبلو وكنشكر الجميع على رسائل الدعم اللي صيفطو ليا”.
وصدرت إذاعة “كاراكول” الكولومبية الشهيرة بلاغ قالت فيه إن المذيع رينتريا ما غايبقاش يقدم برنامج “إل بولسو ديل فوتبول” من الآن بسبب الرحيل ديالو عن الإذاعة.
وكان أوسكار رينتريا انتقذ تصرف الفتاة اللي مشات لدار أشرف حكيمي، وقال: “انا كنأمن ملي شي إمرأة كتمشي لدار شي لاعب خاصها تعرف شنو كيتسناها وشنو تقدر تواجه”.
