هشام نوستيك-كود//

غير تانبغي نهدر ولا نكتب، بحال دابا، على الخدمة، تانتفكر التصويرة ديال الحسن الثاني فواحد لكتاب ديال التربية الإسلامية، راكب فوق تراكتور، ومكتوبة تحت التصويرة: وقل اعملوا فسيرى الله عملكم ورسوله والمؤمنون.

الخدمة كانت ديما مصاحبة معايا. ما نتخيلش راسي ما خدامش، يقدر يركب فيا شي اكتئاب يلا بقيت غير مريح ناشر خصيتاي.

فالدرب خاصك تكون شفار ولا تاتبريكولي باش تعيش، تاشفارت ما قادش عليها، وتا النفس ديالي ما تاتعطينيش نحيد لشي واحد حاجتو. العدل والإحسان تا هي عاونات شوية فهاد السلوك، تانوجه ليها التحية من هاد المنبر.

البزطام ديال أختي ما يمكنش تلقا فيه أكثر من “جدريال”، وديما حاطاه قدامنا تاينش الريح. ما عرفتش واش كانت تاديرها بلعاني، باش تقول لينا دبرو على راسكم القضية حامضة، أو تاتدير التمويه، ويلا عندها شي فلوس راهم مخشيين فالتقاشر والسوتيامات.

أول خدمة خدمت هي “كارانتيكة” – البطاطا والبيض مطحونين ومطيبين فالفران. ما خدمة ما والو. تاتقيل النهار كامل فالغبارية، جامع عليك مرجاوة دايرين على الطاوة، تاتبقى تاتجاهد عين على الطاوة وعين على الزبناء المحتملين، وفآخر النهار تاتدير الحسبة، الجمع والضرب والقسمة، تاتخرج ليك 28 ريال ربح سير خشيها ف..!

مع الوقت بديت تانتقرب من عاشير، البائع الرسمي والوحيد للديطاي، الامبراطور ديال الڭارو. عاشير كان كلشي تايحسدو على النعمة للي عايش فيها، تا من دوك الموظفين للي تايجيو لابسين سروال التوب وتريكو ديال الجّاكار يتقداو 2 ماركيز. من الشوفة ديالهم، ما كرهوش كون كانو هوما لي جالسين على الصندوقة تايدخّلو اللعاقة. تكون نتا عاشير، بحال يلا ربحتي فاللوطو. صحاب لكماية غا يفهمو علاش. غادي للڭيشي تجيب العشبة، تاتدوز على عاشير، راجع من  الڭيشي، خاصك باش تفتخ. موقع استراتيجي.

عاشير قنبال كبير، من درجة مسيلمة الكذاب، كنا فالليل مور الطناش، مين تايقل الرواج الماريخواني، تانمشيو عندو يعاود لينا على المغامرات ديالو، والأخبار للي هو بوحدو للي عندو. هاكا تعرفت عليه فالأول، ودهشرني حيت تايعاود القصص الخيالية بثقة فالنفس ديال السياسيين لكبار. كان قليل فاش تايكمل شي جملة دقة وحدة، ديما تايدير شي نترة ولا شي شربة فالوسط، هاد تايكمل. ربما فديك الاستراحات القصيرة فين كان دماغو تايصنع لكذوب. عاقل على واحد الكذبة بلبل لينا بيها البصلة السيسائية. قال لينا أن أول وحدين مشاو للقمر هوما السوفيات، كان تايموت على الاتحاد السوفياتي، ولكن مين قربو يوصلو تسالا ليهم ليصانس وهوما يرجعو.

عاشير طلع ولد الناس معايا، ولى تايخليني نحضي ليه البيزنيس مرة مرة، وتايدور معايا. درت لاباس فواحد الصيف، ولكن لقراية خرجات عليا. السي عاشير خاصو للي يلتازم معاه وياخذ العمل بجدية، ماشي نهار كاين، نهار ما كاينش.

الناس تايمشيو من شي حاجة للڭارو، أنا مشيت من الڭارو لحوايج أخرين، ما خليت ما درت، جوطية، بلّوط، شامية، كرواصة.. للي طاحت لك فبالك، احتمال كبير نكون درتها، ولكن أصعب التجارب واللي رجعاتني راجل قبل من الوقت، هي غزوات الميكا صاك. العالم للي تاتشري وتبيع فيه الميكا صاك مرييڭل. داير بحال السيستيم الطبقي للي عند لهنود.

الطبقة الأولى فيها السلطة بجميع تجلياتها (بوليسي، مردة)، الطبقة الثانية صحاب لحوانت، الطبقة الثالثة صحاب لكرارس – الذين لا حَانُوتَ لهم، الطبقة الرابعة الدراري لكبار صحاب ميكا صاك والطبقة الخامسة و الأخيرة هي الطبقة ديالنا، البراهش صحاب ميكا صاك. حنا هوما المنبوذين les intouchables، بحال شي كلب هاروش أو ضبع عاصر على شي عضمة. ڭاع الصهد ديال الصراعات الطبقية للي فوقك تايوصلك مضوبل.

الكليان المثالي هوما لعيالات للي ما هازينش .. معاهم لقفاف. غا تقْدَّا يعني خاصها ميكا صاك. تاتشوفها تاتلصق فيها بحال دبانة لحمار. يلا ما بعتيش ليها الميكة بالزربة، تايشوفوها المنافسين وتايولي كلشي تابعها، بحال شي وحدة خارجة بالبيكيني فمكة. الأطفال بحالك تاتلقا معاهم الحل، أقود حاجة توقع هي ضربة فيا ضربة فيك، المشكل فالكبار، تايجي واحد فيهم تايجبدك من شي مفصل تايمحيك، وتايغوفل على لمرا: بْعّْد من الشريفة خليها تقدا! ميكا صاك أ لحاجَّة؟

تاتبقى تشوف من البعيد، السبع تايتمتع بالفريسة للي تعبتي عليها. صحاب لكرارس علاقتهم بينا علاقة حب/كراهية. من واحد الناحية تايعجبهوم الحال لمرا تقدا عرام من عندهم، وتلقى ميكا صاك واجدة فاش تهزو. من ناحية أخرى، تانديرو ليهم الصداع مع صحاب الحوانت، وبالتالي مع السلطة. صحاب الحوانت ماتايحملوش صحاب لكرارس حيت تايقطعو ليهم الرزق، تايدورو مع المرود باش يعربطو عليهم. المرود تايشوفو سبعطاش برهوش وبوركابي مخاريين على شي “ڤيكتيم” د ميكاصاك، تايجيو تايدردكو على “الغاشي”.

التجربة ديالي مع المرود مايمكن تْخْرّْجْ إلا إنسان حاقد على البلاد. أغلب الإعتداءات كانت تاتجي من الخلف، تقرفيدة، ركيل، دفيع، جميع بنص، زرواطة فالضهر.. الضرب كنتي تاتحس بيه أنه انتقامي مَرَضِي. باقي عاقل نهار مشيت لألمانيا، فالعام الأول ضربت دويرة لواحد المتجر كبير تايبيع الأجهزة الإلكترونية، عندهم التلفازات كبار وحاطين “فوتويات”، باش بنادم يز*ل ليه الضمير ويشري، ريحت وبديت تانتفرج، ما يكون دايز غير برنامج على المغرب ف ZDF. للأسف ما عرفتش العنوان ديالو، ولكن بقات واحد الجملة فراسي، للي فاجآتني أن الألمان يقولوها هاكا نيشان، وبكاتني بزز مني حيت فكراتني بالعذاب الأليم للي داز عليا فديك لبلاد ديال النم.

!Marokko gilt nach wie vor als herzloser Polizeistaat

المغرب مازال يعتبر دولة مخزنية ما عندها قلب!

مين كبرت وصحاحيت، وليت تاندبر على خديمات أحسن، لكن المظاهر ديال نكاح كرامة الإنسان كانت ديما حاضرة، الناس للي راس مالهوم الميزان، تايجيو يحيدوه ليهم ويشتفو ليهم على السلعة يخسروها، لعيالات كبار اللي كلاو لعصا بحال البغال، وشرَّاف تصرفقو قدام عينيا. نتا تاكل الهرماكة تقدر تصبر وتكمدها فقلبك، ولكن تشوف إنسان ضعيف، وكاين للي عندهم أمراض عقلية، يُذلُّون ويُهانون لسبب واحد، هو أن accident genetique – حادث جيني – لاحهم فديك الحفرة. هادي صعيب تدوزها يلا كنتي إنسان سوي.

آخر خدمة خدمت قبل ما نودع أحضان الوطن، كانت مع واحد الشلح، عندو حانوت ديال الحوايج فشارع محمد الخامس – كاين شارع واحد فقنيطرة هو هذا. خدمة نقية واخا لفلوس عيانة. مائة درهم فالسيمانة. وقعو ليا فيها جوج مواقف فشكل، واحد مضحك وواحد مبكي. نبداو بالخايب، الشلح ما كانش تايتيق فيا، حيت أنا، بكل بساطة، ماشي شلح. تاتحس بشوية د العنصرية تجاهك. ڭاع الخدامة – كلهم شلوح – الآخرين كان عندهم الحق يحلو المجر للي فيه لفلوس، إلا أنا. ماشي مشكل هانية. واحد النهار كنت غير أنا وياه فالحانوت، قال ليا حضي أنا راجع، مشا يتقدا التذكرة ديال الكار لأڭادير. شاءت الأقدار أنه غير خرج، دخل واحد لعروبي يشري سباط. “نورمالمون” الناس تايسخسخوك قبل ما يشريو، ولكن خونا بيه فيه، لبس السباط وعطاني 150 درهم. خاصني نرد ليه ثلاثين درهم. أنا عارف ممنوع نقرب من المجر، ولكن قلت هذا استثناء. غير تانسد لمجر وجاي راجع، تايوقف عليا الشاف. عييت ما نشرح، والعروبي مازال معانا، والو.

المضحك هو أن شي ساعة من بعد، رجع لعروبي للحانوت. الطالون ديال السباط تفرتت! ولى بحال الفرشي، حيت قديم بزاف.

الموقف الثاني خاصو يتشاف، ولكن غا نحاول نقرب الصورة. واحد النهار فالصيف، ما بينا ما علينا فالحانوت، تا وقف قدامنا كار ديال السياح. داك الوقت يلا شفتي شي نصراني، بحال يلا شفتي الملك.

بداو السياح يخرجو من الكار، وبدا سراق الزيت – حنا – تايخرج من الثقابي. الشقراوات حدث ولا حرج. حسينا براسنا بحال يلا تانحلمو. منظر شديد الغرابة، كلشي قيم.. الوضع، خلا الخدمة، وخرج على برا يتبرك ببركة سيدنا عيسى. الشيء الأغرب هو للي وقع من بعد، واللي لحد الآن مازال ما فهمتش علاش وقع. هبطات واحد السائحة صغيرة، ربما 16 عام ما تفوتهاش، لابسة صاية قصيرة بيضة، وهي تجلس فالدروج ديال الكار. نعم إنها الفتنة! قلت أنه صعيب نوصف شنو وقع لأنه غريب فعلا. كلشي الناس للي كانو فداك الزمكان، صحاب لحوانت، الكليان، بنادم للي دايز، كلشي حبس. للي عندو فين يجلس جلس، للي ما عندوش تكا على الحيط، وبحركات سلطعونية بدأ التجمع الهرموني الخِصْيَوي يميل ويتمايل، باش يكون فخط مستقيم بين العينين وسليپ الڭاورية.

مستحيل ما تكونش السيدة لاحضات ثورة الكبت اللي ناضت بسبابها. علاش بقات جالسة ورجليها مفرقين؟ واش عجبها الحال؟ واش حنات علينا؟ تا نمشي لجهنم ونسول الله.

السؤال “الوجودي” للي مازال ما جاوبتش عليه هو فلوس الخدمة فين كانت تاتمشي؟