مباشرة من بعد ما شفت النقط ديالي فالسيت دلافاك صونيت على العشران فمكناس باش يخليو ليا السوارت د البرتوت يلا حتاجيتو حيت الراطراباج كيفما هو معروف لا دين له مكيرحمش كيجيك في رمضان وزيد عليه القطعة والامتحانات لي عندها علاقة كبيرة بالخيال العلمي وعاد كيفاش خاصك دير فالفطور وحيث خوكم كينتمي لطبقة النبلاء في هاد البلاد فأنا طالب غير ممنوح ,المهم من بعد مرحلة الاكتئاب هزيت كتوبتي وصاكي وطلعت فأول قطار غادي لمكناس مباشرة بدأت حلقة جديدة من المسلسل الشهير ديال السليت والحضية مع الكونتلرولور هاد المسلسل الرومانسي الي كمية الأكشن فيه كضاعف الكمية دالأكشن د ميسيون أمبوسيبل للممثل الشهير توم كروز كل مرة وكيفاش كندير نسلك راسي , هاد المرة مخرجاتش سالمة وطحت في حميد الكونترولور لي مكتنفعش معاه الحيلة ديال عمي حنا غير طلبة, شنق عليا ومتفاهمش معايا حتى خلصت 80 درهم منين وصلت للمحطة دمكناس, مع الخرجة بديت كنفكر فبزاف دالحوايج من بينهن انني نبدل الكلية أولا حيث الأساتذة فيها يفرعوك يفرعوك فالتصحيح واخا تكون انت هو جون ماينارد كينز دالعهد ديالك, ومكناس تانيا حيت رونتها مونتيفات فيها والقهاوي كلهم تعرفت فيهم كنكونسومي ونزيد, زيادة على هذا الكونترولات لي كيكونو فالطريق دمكناس من أقبح ما يوجد على وجه الأرض فين تبان قباحة السي الراضي فمجلس المستشارين ولا السي الرميد أيامات المعارضة المهم ماعلينا خلينا من السياسة حيت طلعات لي فراسي بكترة الحلقيات فلافاك, ماعلينا لقيت الدراري كيتسناوني فحمرية فالطوموبيل سارقها واحد عشيري لخالته الدراري كاملين علامات القطعة بادية على محياهم تحركنا لدار واحد صاحبي ساكن فيها بوحدو وبقينا عاصرين على اذان المغرب شي كيلعب بلاي شي حال دفتار وأنا كنفكر فديك 80 درهم لي مشاتلي. الاذان دالمغرب قريب مابقالو والو نضت للحانوت نجيب باش نفطر انا وصاحبي مع الهبطة من العمارة ترالي واحد البلان مكنتش كنتوقعو