هند لكلاوي كود ////

رجل سلطة بالاذاعة 1986. 2003″ مذكرات شيقة لمدير الاذاعة السابق عبد الرحمان عشور. الكتاب اللي تطبع فدار النشر المغربية وغادي يتوزع قريبا من قبل “سبريس” فيه رواية غير مسبوقة. كيقدمها احد رجالات الداخلية اللي سيرو الاعلام العمومي 17 عام. يعني حتى باش بقى 4 سنين بعد ما تم عزل البصري ف1999.

فهاد الكتاب اللي فيه 423 صفحة فيه معطيات كثيرة حول الاذاعة والعمل الاذاعي. فيه معطيات كثيرة على كل قسم قسم. ربع لكتاب مخصص غير للملاحق اللي ممكن تعاون بزاف بزاف بزاف الباحثين.

حنا ف”كود” غاديين نخليو هاد الشي يكتاشفوه اللي غاديين يشريو لكتاب اللي ثمنو غير ب90 درهم وغاديين نركزو بشكل اساسي علي ادريس البصري او اسلوب ادريس البصري. كيفاش كان كيخدم هاد الرجل غادي يبان واحد الجانب منو فقصص حكاها عشور.

قبل هاد الشي لكتاب مافيهش ادعاءات ولا استاذية. فيه جوانب من شخصية عشور. ماشي محب للظهور ولا لاعطاء الدروس. يمكن الرد الوحيد دارو على كتاب صدر فالسابق. لكتاب ماشي تمجيد لعمل الداخلية فالاعلام. حقاش كاين انتقادات فيه. فنفس الوقت ماشي ادانة لهاد الهيمنة حقاش كيقدم راسو ابن الداخلية اللي ديما كانت عندو رغبة يرجع لادارتو. كيدافع على كل ما قامو بيه هاد العمال او رجالات الداخلية.

اسلوب البصري كيبان فهاد المذكرات اللي حصلات عليها “كود” من الصفحات الاولى. فجوج يوليوز 1986 جا عشور تلفون من مدير ديوان البصري انذاك اظريف. قال ليه بغاه الوزير. البصري قال ليه بغيت نشوفك فداري غدا مع لحداش ونص” ودوز ليه مدير الديوان باش يشرح ليه. طبعا ما شرح ليه والو. يوم 3 يوليوز جا ولقى مجموعة من اطر الداخلية وشي اساتذة جامعيين والسينمائي سهيل بنبركة. تسناو كيف عادة البصري وباش لبس ادريس السينمائي بنبركة كوستيم جديد وصباط حقاش حالتو ما كانتش للقاء رسمي هزهم فطونوبيلة بلا ما يقول ليهم فين غاديين. حتى وصلو لقصر الصخيرات. دخلو ما عارفينش علاش.

البصري جبد ورقة من جيبو وبدا يقرا التعيينات. طريشا مدير عام الاذاعة والتلفزيون. عشور مدير الاذاعة الوطنية. ايساري مدير التلفزة المغربية….. سهيل بنبركة مدير المركز السينمائي المغربي.

تصور حتى حد ما فراسو. وباش بغى يديهم للملك يعينهم شافهم وقال ليهم فين اللبسة المخزنية. مشاو حتى الغد رابع يوليوز غادي تم تعيينهم

فالكتاب يظهر كيف كان ادريس البصري كيرفض شي حد يتعامل مع شي جهة من غيرو. ممنوع شي امر ياخدو شي مسؤول من غيرو هو. كيدير اجتماعات عندو فالوزارة وكيحضروها كاع الولاة. كتكون على الوضع العام. وقع شي وحدين بغاو يقربو للقصر ولا للامراء ولا لشي موظفين سامين. كلهم تحرقو كلهم تعاقبو

البصري كيف جا فجانب من المذكرات واكرر باللي المذكرات فيها غير قصص فقط من هاد الشي. الجانب الاخر فيه مواضيع كثيرة ومختلفة٬ كان ديما يردد “اللي فضح سرنا يعمى” و”هما يقولو اللي بغاو وحنا نديرو اللي بغينا”.

لكتاب مكتوب باسلوب ساخر احيانا تقريري احيانا اخرى. ما فيهش تصفية الحسابات. ما فيهش ادعاءات. اسلوبو ماشي يقيني. يستحق يتقرا ويتعاود يتقرا. نشوفو اش تبدل البارح على اليوم. شي غادي يقول بعد ما يساليه والو وشي غادي يقول ضيعنا الفرصة وشي غادي يقول تبدلو حوايج ومازال حوايج