كود كازا ////

فضيحة كبيرة. بدات فتسجيل صوتي دار هادي 4 ايام. فالاول اتهم بنك معروف بانو هو المعني بالفضيحة. اليوم خرج رسالة رسلها مستخدم ف”كريدي دي ماروك ايميل زولا” فكازا اسمه يوسف وجهها الى مسؤولي البنك كيتشكاو من هاد المدير اللي اسمو خالد او الحاج.

التسجيل ايلى سمعوه لمغاربة حتى حد ما يبقى حاط حسابو فهاد البنك. فالتسجيل الاول واللي باين دارو يوسف. سبو وسب لكليان. هاد المسؤول اللي باينة عليه سلطوي. متخلف لان كلامو بلا سبان باين معقول ولكن باش كيخرج احقادو كيولي متخلف خاصو طرد من البنكة ومحاكمة كاع من قبل هاد المستخدم.

قال ليه “نوض تخدم ولا نشير عليك” فشي اجاونس” ثم اضاف باللي عندو فوكالة ايميل زولا فكازا كليان ما كاينين حتى فشي بلاصة” ثم سب باقي زبناء الوكالة وقال ليهم “حامضين ايلى تكى عليك خاصك تدوش” واعتبر “كليان ايميل زولا “النصارى وفاسة” و”الناس المهمين” هما الواعرين.

فالتسجيل الثاني سبو على شي خدمة قال باللي ما دارهاش مزيان. فالمضمون مسؤول عندو الحق يدخل ايلى كان شي مبلغ ديال 400 الف درهم غادي يضيع لكن اللغة والاسلوب والطريقة كلها ديال متعجرف وبزاف. قال ليه “ما تكونش حمار” و”ياك ما حمق غاديين نحيدوك انت” وتهديدات كثيرة. كلشي يخلي هاد المستخدم اللي قدم استقالتو كيف حصلت “كود” على نسخة منها يمشي لمفتش الشغل عوض ما يستاقل. ترهيب وسب واحتقار لمستخدم.

المشكلة الحقيقية كيفاش هاد النوع خدام مسؤول فبنكة. واش لمغاربة اللي عندهم حساب فهاد البنكة يقبلو هاد السب.