كود الرباط//

بعض العائلات اختارت الطرق الملتوية باش تعيد بشكل جماعي مع أبنائها وأفرادها المتفرقين داخل نفس المدينة. حسب ما كشفه شهود عيان لـ”كود”.

وحسب مصادر “كود” فإن بعض أفراد العائلات لي كاينين ف سلا ورباط ونواحي تجمعو قبل الساعة السادسة من مساء يوم أمس، بالرغم من التحذيرات لي كتصدرها وزارة الصحة لتفادي انتشار فيروس كورونا داخل البؤر العائلية، نظرا لصعوبة تحديد المصابين من غيرهم في ظل “وجود حاملين للفيروس بدون أن تظهر عليهم أعراض المرض”.

ماشي غير سلا، رباط وكاز، وفق ما كشفته مصادر “كود”، وربما تا مدن أخرى غاتشهد نفس القضية خصوصا بين العائلات لي كاينين ف نفس المدينة.

لي عندو خوه مزوج ولا ختو وبوليداتهم مشاو عند والديهم ولا عند عائلتهم، وتحداو الحجر الصحي والاجراءات باش دوزو فرحة العيد. ونساو بلي يقدرو يتسببو ف بؤر عائلية لانتشار فيروس “كورونا”.

دبا هادو كيقلبو على نكسة العيد ماشي فرحة العيد. راه الدولة مدارتش هاد الاجراءات باش يجي شي حد باسم الدين ولا باسم الأعراف ديال الاحتفالات ويهرس كولشي.

مصادر مسؤولة قالت لـ”كود” :”لا تساهل مع حركة التجوال صباح العيد حيث مبغيناش العيد يتحول الى مآسي جديدة”.