سامي العلوي -كود كازا //

كشفات مصادر مطلعة ل ” كود “، ان المحكمة الجزرية بعين السبع شهدات يوم امس الاتنين حالة من التعبئة والاستنفار بعد أن حلت لجنة من المفتشية العامة للقضاء بالمحكمة من أجل تفقد سير هاد المحكمة، ووضعية الملفات بها وكذا الاستماع الى قضاة.

وأضافت المصادر نفسها، ان اعضاء لجنة التفتيش اسمعو الى بعض نواب الملك على خلفية ملف النائب ديال وكيل الملك يشتبه فكونو كيتزعم عصابة متخصصة فالسمسرة في الملفات القضائية والتلاعب بالقرارات فالمحكمة ديال عين السبع لي اصلا كتعيش مشاكل من اللول ديال هاد العام وجات ليها لجنة المفتشية العامة ديال المجلس الاعلى للسلطة القضائية.

مصادر ” كود ” قالت ان حالة استنفار عرفتها المحكمة الابتدائية مباشرة بعد وصول لجنة التفتيش ، بحيت يترقب أن تضع لجنة التفيش يديها على عدد من الملفات اللي اكتست طابعا فضائحيا منها ملفات أسالت الكثير من الجدل، و كانت محط علامات استفهام، ونقاش ساخن في أروقة المحكمة وعند أصحاب البدلة السوداء بفعل التجاوزات اللي لاحقتها الى جانب ملفات اخرى يتوقع أن تنبش اللجنة في تفاصليها وملابساتها و أحكامها المثيرة للجدل.

المصدر ذاته اضاف ان فلم الريزو ديال سماسرية اللي شوهو صمعة القضاء مزال كاين فيه تحقيقات، مضيفا ان هاد التحقيقات اللي باشرتها لجنة التفتيش و عناصر الفرقة الوطنية لشرطة القضائية بكازا غادي طيح وحدين اخرين في سلك القضاء، بالاضافة الى إعفاءات الى بينات التحقيقات انهم متورطين فهاد الريزو ديال تسمسير.