على المواطن الجزائري أن يستفيد من خريطة المغرب! إذا فشلت في حياتك. أو في الحب. أو في أي امتحان. أو أصبت بكسر. أو بالتواء في الكاحل. فقل السبب هو خريطة المغرب
كود بروكسيل ///
واحد الاسلامي مغربي اسمه عبد الحكيم الصفريوي كان منتمي للتيار الدعوي اللي دار العدالة والتنمية وملي وصل فرنسا تطرف خصوصا ملي شد الجنسية عبر الزواج بفرنسيا، وكان كايلقب على الشهرة و الزعامة بأي ثمن، دار واحد التحالف اسمه تحالف الشيخ ياسين، مؤسس حماس، وبقا عاطيها للمظاهرات و جمع التبرعات و دار علاقات مع قطر و الإخوان ومع فرنسا علمانية و فيه فراغ فمن جهة المؤسسات اللي كتمثل المسلمين مشا دار هو وجوج د الناس تنظيم اخر باش يهضر باسم المسلمين اسمه مجلس أئمة فرنسا.
ولكن لقا الفرصة د الشهرة اكثر ف المناوشات مع بعض الائمة المشاهير اللي كايكونو متفقين مع اليمين الفرنسي بحال الشلغومي و دليل، غير كايعبرو على شي رأي مخالف للعامة مثلا اتفاقهم مع الحكومة على حظر النقاب او صداقتهم مع اليهود الفرنسيين، كاينوض يجمع شي جقلة و يهاجم مساجدهم..ف هاد الحادث الاخير، غير نشر اب تلميذة فيديو على درس الاستاذ اللي تقتل، وهو يجري حتى لديك المنطقة ومشا مع الاب يحتج لدى الادارة ودار تصريحات غادي نديرو مظاهرات و غادي نرفعو دعوى و بقا كايسخن الطرح.. كما كايديرو ديما المسلمين الكيوت مع الدواعش ..كانت فرصة زوينة باش يبان ثاني ..ولكن نسا أن واحد الشاب فعمره 18 عام كايسمع من بعيد ومتبع الموضوع وهو اللي دار اللي دار..خونا الصفريوي جاب الربحة و تعتقل اليوم وربما يحيدو ليه الجنسية ويترسل للمغرب يتشمس شوية.
هادشي كله من راس داك الاب الجاهل، درس حرية التعبير كايقدمو الاستاذ من سنوات وكايعطي امثلة على حدود حرية التعبير والاشكاليات د الموضوع بقضية شارلي ايبدو وكايبين بعض الكاريكاتورات د المجلة اللي من ضمنها كايريكاتورات تصور الذات الالهية و الانبياء و تسخر من جميع الديانات..والاستاذ حيث متفهم من حساسية المسلمين ديما كايطلب من التلاميذ المسلمين يخرجو الا بغاو بلا مايشوفو فقرة الصور، و الاب الحمار بدل مايدير شكاية ويتساءل بشكل حضاري ويكتشفي بجواب الادارة مشا دار فيديو كايقول فيه اسم الاستاذ و المدرسة ويمكن نشر صورة الاستاذ تاهو ومشا كايقلب على امثال الصفريوي..اللي لو بقا ف المغرب ماغاديش يفوت مستوى أمين مال فرع البيجيدي ف شي دوار.