كود الرباط ///
برمج مجلس جهة الرباط سلا 29 نقطة للتداول بين أعضائه برسم دورة مارس اللي انطلقت قبل بمقر الجهة بالعاصمة. اللافت للانتباه أن هاذ 29 نقطة مفيها حتا شي نقطة التقطت الظرفية اللي كيعيشها المغرب فيما يتعلق بجائحة كورونا، مكاين غي اتفاقيات الشراكة هاذ الشي حادكين فيه.
هاذ الشي كيبين ان المجالس المنتخبة غادة بسرعة بطئية ومكتقدرش تفاعل بسرعة مع الظروف الي كتعيشها البلاد. مجلس جهة الرباط سلا القنيطرة اللي الميزانية ديالو قريبة لـ 100 مليار مقدر يدير حتى شي نقطة عندها بعد أو طابع اجتماعي في وقت تحتاج فيه ساكنة الجهة للدعم الاجتماعي لتجاوز تداعيات كورونا على الاقتصاد الجهوي و الأحوال الاجتماعية للساكنة.
هاذ مجلس الجهة اللي كيتخلص الرئيس ديالو بحال الوزراء وعندو عشرة ديال النواب وعدة لجان ووكالة تنفيذ المشاريع و من بين أعضاءها شي 16 برلماني وزير ومدير وكالة وطنية ورئيس مجلس المستشارين مقدراتش تبرمج شي نقط استثنائية تماشى مع الظرفية الاقتصادية باش تعاون الناس اللي كيعيشوا الهشاشة.
الحاجة الوحيدة اللي طلعات لشي الدم عند انطلاق دورة مارس صباح اليوم الاثنين هو الاحتجاج على تأخر الوالي على موعد الاجتماع بأكثر من نص ساعة واعتابروه إهانة ليهم و آشنو غيقولوا المواطنين اللي صوتوا عليهم ومادراو ليهم والو فست سنوات واش هاذيك ماشي إهانة.