عفراء علوي محمدي- كود//

عبر يونس مجاهد، رئيس الاتحاد الدولي للصحافيين ورئيس المجلس الوطني للصحافة، على رفضو لمشروع القانون 22.20 المتعلق باستعمال شبكات التواصل الاجتماعي وشبكات البث المفتوح والشبكات المماثلة، وأكد بللي ماشي معقول يتم استغلال الظرفية ديال حالة الطوارئ الصحية المرتبطة ب”كوفيد 19″ باش يتمرر قانون بحال هذا.

وقال مجاهد، فبلاغ للاتحاد الدولي للصحافيين، صدر اليوم الثلاثاء، بللي هو كيرفض، باسم الاتحاد تكميم حرية التعبير ديال المواطنين وحرية الصحافة من طرف الحكومة المغربية، كيف كيطالب بسحب هذ القانون بشكل فوري، حيت كيتعارض مع جميع الاتفاقيات الدولية المرتبطة بحقوق الإنسان وحرية التعبير والرأي اللي موقع عليها المغرب.

وشار مجاهد بللي الدستور المغربي كيأكد على ممارسة الديمقراطية التشاركية، من خلال عمليات التواصل المنتظم والحوار مع المؤسسات المهنية والمنظمات المجتمع المدني المعنية حول مختلف القرارلت والسياسات والمشاريع اللي كتهم المواطنين.

وشدد بللي هذا هو المقف الرسمي للاتحاد من هذ القانون، وهو كذلك موقف النقابة الوطنية للصحافة المغربية اللي كتعتبر عضوة فيه.

ومشروع القانون 22.20 دار ضجة كبيرة من بعد ما تسربات مواد فيه، وكيتعلق الأمر بالمواد 13 14 18 اللي كيجرمو انتقاد جودة منتوج ما ولا الاحتجاج عليه ولا الدعوة لمقاطعتو، وكتنص على إدانة مقترفي هذ الافعال بغرامات مرتفعة والحبس من ست شهور حتى ل3 سنين.

وتمت المصادقة على هذ مشوع القانون ف19 مارس، لكنه مازال قيد المناقشة ومازال ما تمرر للبرلمان، كيف الحكومة ماوضعاتوش فالموقع الرسمي للأمانة العامة بحال مشاريغ القوانين الأخرى.