جواد الأنصاري- كود /////

—

هاد المعرض الدولي ديال لكواغط لي على الابواب  ديال الدّار البيضا يُعد تقريباً بمثابة العواشر الموسمية ديال المُوثقافين، كيديرو كاميراتهم في صيكانهم، ويحجّون من استطاع اليه سبيلا ،وحتى من لم يستطع إليه سبيلا لا يُفوّت عليه فرصة إلتقاط السيلفيات مع زملائه في هادشي ديال الثقافة ،وعادة ديك الأيام الأولى كتعرف واحد الإكتظاظ رهيب بفعل اللهفة ديال خوتنا في الله ،غير هو الحصيلة دائما ما تكون في النهاية هي أن أخذ الصور يفوق بشكل كبير معدل اخذ الكتب،بحيث كاين لي كيمشي فقط من باب لبروتوكول،وخصيصا غا باش يضرب ليه شي تصيورات غا ويبارطاجيهم فلفيس،  ويقلي لينا حنا معشر الامين الجهال السم ،وفي أخر المطاف هو كيدي معه شي كتيب ديال شهيوات شميشة، كادو للواليدة وكينوض نايض ،واكاين عوتاني بعض الموثقافين  لي كيخليو أصلا لمكتبات غير حداهم فمدنهم، وكيجيو ليه غا من باب عيق علي نعيق عليك،لهذا وبناء عليه فقد قرقرت تانا مع نفسي هاد لعام باش غنمشي لجد بوه هاد لمعرض، وغنشري ما تيسر من الكتب، نقرا ونتعلم، باش مايبقاوش ديما يحكرو عليا رباعة الموثقافين ،حيتاش شحال من مرة كيضحكو عليا حيث مكنفرقش حتى بين حنا مينا وباسكال مشعلاني وكان اصلا يسحابلي هاد حنا مينا غا مرا ،

وفينما كنكون فشي جلسة تضم ناس قراو ما يفوق عشرة كتب ،كنحس براسي وسطهم زي “ثور الله في برسيمو” ،لدرجة انه واحد صاحبي مسكين ديما فين كنشوفوهم كيبقاو يستشهدو بالعظماء ،بحال نيتشة وسارتر وكامو  وبارخاس يوسا وميشيل اونفري، وكيناقشو سياسة أمريكا الفاشلة في تدبير الشأن المحلي والإقليمي ،و،كنبقى عليهم انا ويييه را قالها الكريمي وييييه تا هادي را قالوها الهناوات اه حتا حنا عنا هادشي فدوار والله .. كيقولي شوف اربي لما جيتي معنا عود غا ريح وسكت عفاااك… ماتبقاش تدوي أزمر، راك شوهتيني ،

ولكن دابا هيهات هيهات، لقد دقّت ساعة الحسم،من دابا ما كاين نعماسيدي غا أرا برع، انا حالف بحلوفي تايولي كيحترموني ،فرحانين بدوك جوج كتيبات لي قارين ،وباركين تغمقو علينا بديك لهدرا ديال السوسيولوجيا والهيرمونيطيقا والانتربولوجية والإستيطيقة وهذا إن دل فإنما يدل،

وأصلا هادشي ديال لقراءة والثقافة وخ هكاك راني ماشي حديث لعهد به ،راني قااااري مع راسي تانا شي بركة ديال داكشي التنمية الذاتية تحت الرعاية السامية للفقي  لي عيا مايوريني مسكين كيفاش ندير باش نولي ناجح ،غا هو من نهار قريت ليه ماعمرني طفرتو مع الأسف، ومشيت بعتهم ، وقريت لخبز لحافي، وحفظتو عن ظهر قلب تقريباً ،بكثرة عدد لمرات لي عاودتو ،ساعة تاهوا كان كيشجعني غيير على الرذيلة، وعطيتو لواحد صاحبي من اجل الإستمناء عليه، وقنديل أم هاشم كنت ديما كنهزو معايا فطوبيس وكنبقى شادو فيدي زعما زعما

ودابا بعدما بلغ السيل الزبى وعرفت أنه ايلا بقيت كنقرا فقط من أجل الإستمناء أولهاد ام هاشم هادي او باش نكون بالضرورة ناجح فراه عمر ديلمي مغاندير الطيلة مع هاد الموثقافين،لذلك حاولت نكون إلى حد ما دقيق شوية في انتقائي لعينة ديال الكتب لي نشعلاه وخ هكاك وليت اباري وأباهي بها الموثقافين في كل مكان وزمان ومايبقاوش كيردوني ضحكة نهائيا وهذا  تأتى لي من بعد ما تعرفت أول مرة على أحد الكتاب الذين أكاد أجزم يقينا تاما أنه لن يكررهم التاريخ بتاتا منبتاً.. وبعيدا شوية على الطنز أرجو توفير شيء من حسن النية ..فهذا ليس توجيه ذو طابع إستعلائي نهائيا، وبإمكانك إعتبارها هادشي مجرد إرتسامات لقويرء مثلي على هامش لموضوع ديال معرض لكواغط ،ولديك خيار تجاهلها ،فإيلا كنتي من الذين تستهويهم الروايات بشكل أولوي والقراءة على العموم فأنا أحيلك إلى السقف بالنسبة لي انا بعدا  اللي كسر كل قواعد الكتابة الأدبية تماما ولي غنبقى مدين ليه جدا على ود ديك المتعة اولا ديال القراءة له وثم الانقلاب الفكري لي جا نتيجة قراءة بعض كتبه رواياته العظيمة

فيودور دوستويفسكي هاد الكاتب ربما نقدر نقوليك انه (“في حااالة ما”) عمرك قريتي ليه، ثم وضعته فعلا  نصب جدول إهتمامك وتبليتي بلقراية ليه فربما قد تطالب بإعتقال كافة من يدّعون ممارسة الكتابة بالمؤبد مع الأعمال الشاقة مع قليل من الاسثتناءات،وربما دابا يقدر يتباذر ليك سؤال من قبيل علاش مثلا مابان ليك غا هو بالرغم من وجود بزاف ديال العباقرة ودرتيه محور إختتامك في المقال عن القراءة وهادشي ديال الكتب  غنقوليك لأنه بكل بساطة هذا “أيلا ماكنتيش ديجا عارفو”غيوفر عليك بزاف ديال العناء في البحث حيتاش لدي يقين تام كيما سبق وقلت على ان التاريخ ماعمرو غادي يكرر داهية بحالو دستويفسكي نهائيا، و ثق بيا ايلا قلت ليك انك بمجرد ما تقرا ليه “بعومق”غادي تتعرف على راسك مزيان وغادي تعرف على طبيعة لبشري كيف دايرة لانه الوحيد لي دوز تقريبا كل المآسي الحياة التي قد تخطر لك على بالك من اعتقال والنفي لسيبيريا وكان على شفا جرف من الإعدام وحاول ما مرة ما جوج الانتحار وكان مريضا بالصرع ومدمنا إدمان لا يُطاق على لقمر وزيد وزيد ،وبإختصار وباش مانطولش دوستويفسكي وحده سيغنيك عمقه عن هٌراء كل الكتاتيب ، ولمحكتكم الموقرة واسع النظر

ونداء لكل الموثقفين لي غيمشيو للمعرض عفاكم ايلا ما ديرو الصف ، را حشومة ،لي تصور يحيد يخلي زميلو يتصور تاهوا ،ديرو النظام

وشكرا