هناء ابو علي – كود كازا ///

33 ملمتر ف5 سوايع البارح فالعشية غرقات العاصمة الاقتصادية ووجه المغرب الزوين زعما. ماشي غير تيران محمد الخامس اللي تقصات فيه الراجا البارح اللي ولى ضاية. الملعب يمكن كانت حالتو زوينة بزاف. احياء كثيرة فكازا غرقات بصاح.

احياء فكاع البلايص من البرنوصي حتى ليساسفة ودوزو على احياء كازا.

مجلس المدينة اللي كيرأسو العدالة والتنمية وعندو الاغلبية المطلقة واخا دخل معاه احزاب اخرى٬ ما مسوقش. العمدة عبد العزيز العماري كيخاف من الاضواء وعاطي كلشي لنائبو حيكر. حتى باش يخرجو يشرحو لبيضاوا اش وقع ما داروهاش.

البارح رجع لذاكرة كازا فيضانات سابقة. كانو كيقولو ما بقاتش. البارح عائلات كثيرة بيضاوية مشى ليهم حوايجهم. ما قدروش ينعسو فديورهم. الصميقلي تزاد على الشتا والجايحة راه بزاف علي كازاوا.