كود حكيمة لعروسي ////

قضية الساعة جميع الناس تايهاجموه نساو صلب القضية وشادين في الفيراري ولقب ولد الفشوش … حقد طبقي بمعنى الكلمة … مافهمتش علاش جبتدو عائلة الدرهم وبقيتو تسبو وتوجهو ليهم اتهامات خاوية لمجرد أنهم ناس أغنياء وناجحين في حياتهم … بيناتنا شكون فيكم يكره يعيش حياة حمزة ؟؟ واقيلا هاعلاش بان الحسد ديال بصح في كلامكم .. تعلمو تقولو الله يغنيه ويزيدو و الله يغنينا حتى احنا معاه ….

فين كاين المشكل ؟؟ بلغة العقل والمنطق أنا تانشوف الغلط اللي دار حمزة هو أنه ساق الطموبيل وهو سكران غلط في حق نفسو وفي حق الناس .. لأن بهاد الإستهتار ديالو اللي جاي من طيش الشباب وعقل الصغر كان ممكن يموت هو في الحادثة أو يقتل شي حد لا قدر الله …

أنا مافهمتش علاش هاد الهجوم كلو على حمزة والعائلة ديالو مع أن كاين ولاد الشعب مساكن اللي كايشمو غير الغلاقة وتايهزو سيف و يخويو درب على قدو وكاين اللي ملي تايجيو البوليس يشدوهم تايشيرو عليهم بالقراعي من فوق السطوحا وتايضاربو معاهم بالسيوفا والتعربيط وتخصار الهضرة مساكن وملي تاتشوفو الفيديوات تاتقلو عليهم ضحايا التهميش والمجتمع كلكم كاتوليو دكاترة نفسيين ومصلحين اجتماعيين في دقيقة مع ولاد الشعب ، وحمزة حيت لاباس عليه تاواحد ماقال ممكن يكون ضحية لأن اللي عندهم الفلوس ماعمرنا نقولو ضحايا ديما تانحقدو عليهم ….

اللي ماعجبنيش أنكم كلكم تاتقولو البوليسي هو الحلقة الضعيفة لأن كون دار خدمتو كون نفاوه ولا طيروه من بلاصتو .. مابغيتوش تفهمو أنه كان خاصو يطبق القانون وديك الساعة ايلا تعرضو ليه يتوجه لطلب حقو بالقانون ويدير فيديو والصحافة والناشطين الفايسبوكيين كلنا نوقفو معاه حتى يوصل صوتو للمسؤولين وياخد حقو … شحال من واحد في خدمتو تايتعرض لمضايقات بسبب التشبت بالمبادئ ديالو إيلا جا كل واحد يخالف القانون حيت خايف يطير من بلاصتو عمرنا ماغادي نتصلحو …. تخيلو هاد البوليسي اللي تايفكر بهاد الطريقة أنه ماينفدش القانون على حمزة وكون لقى واحد سايق سيمكا كيفاش كان غادي يتعامل معاه !! و شحال من تصرفيقة كان غادي يعطيه لمجرد أنه فقير و دار مخالفة ممكن يديرها أي واحد ..
المهم حمزة تشد دابا وتايبقى التقدير للنيابة العامة وللقاضي والمحكمة حسب ملابسات القضية …

وأنا مع قرار السيد الحموشي وأؤيده وتانشكرو حيت تايدير خدمتو بضمير حسب المسطرة القانونية .

وكانتمنى أن هذا يكون درس لحمزة ودرس للبوليسي اللي مادارش خدمتو ودرس لينا أن تاواحد مافوق القانون وكلنا سواسية اللي غلط يتحاسب ….
رسائلي للكبار فهما لا الكبار سنا .
الله يجيب اللي يفهمنا ولا يعطيناش .