كود احمد الطيب ///
تصورو حزب فالحكومة. جاب مشروع قانون للكيف. وزراء فيه خاصة وزير الدولة كيدافع عليه وكيردد باللي المشروع مزيان ورئيس الحكومة الامين العام لنفس الحزب=البي جي دي= كيقول حتى هو باللي المشروع كيحل مشكل بقى كثر من 40 عام بلا حل وباللي غادي يقطع الطريق على اباطرة المخدرات. واخا هاد الشي كولو نواب الحزب فالبرلمان بغرفتيه باغيين يصوتو ضدو ولسبب غريب.
وفق الاجتماع اللي دارو نواب الحزب بيناتهم بداية الاسبوع ثم بعد 24 ساعة لقاءهم مع الامين العام رئيس الحكومة٬ فالغالبية باغية تصوت ضد المشروع. وفق نائب من الحزب ل”كود” فهاد القرار جا “ضد تصرف وزير الداخلية عبد الوافي لفتيت”. المصدر قال ل”كود” ان اجوبة الوزير على تساؤلات نواب الحزب كان فيها تهكم وسخرية وحتى احتقار. وباللي الوزير كيرد غير عليهم وبعض المرات رد قاصح.
لكن اللي بان فالفيديو ديال اول نقاش للموضوع فلجنة الداخلية هو ان لفتيت باش بغى يجاوب البرلماني المقرئ ابو زيد لقاه خرج من القاعة. اي ما تسوقش گاع لجوابو.
دابا الحزب مازال كيتسنى قرار الامانة العامة بخصوص التصويت. هاد الامانة حتى هي منقسمة بين رفض وقبول. كاينين شي نواب حسمو موقفهم. عددهم شي 10 وفق مصادر من البيجيدي ل”كود”٬ هادو غاديين يصوتو ضد المشروع٬ لكن الغالبية اللي كانت باغية تمتانع او تصوت لصالح المشروع٬ ولات باغية تصوت ضد.
بالاضافة الى ما اعتبروه تصرفات ساخرة من الوزير اتجاههم٬ كاين حوايج خرى مقلقاهم: القاسم الانتخابي وما سموه مضايقات لنواب ديالهم فمدن مغربية.
دابا البي جي دي بهاد الشي غادي ويدخل فعزلة سياسية. حقاش مشروع القانون عندو الاغلبية بتصويت البام والاستقلال والبي بي اس اللي فالمعارضة. ايلى صوتو من غير الموافقة٬ غاديين تزاد عزلتهم. راه قيادي كبير فالحزب كان قال ل”كود” “القاسم الانتخابي راه غير بدية. ما عرفناش اش كيوجدو من بعد”.