الرئيسية > آراء > مايمكنش تطلب من شعب يحتل الرتبة 122 فمؤشر التنمية البشرية مايتبعش لايڤات الملولي و نزار و ندى حاسي و القايدة غيتة و الشكح و الشاخدة و غيتة قطر و صوفيا طالوني و مي نعيمة ! راه هادو هوما النجوم لي كايشبهو لينا
02/03/2021 16:00 آراء

مايمكنش تطلب من شعب يحتل الرتبة 122 فمؤشر التنمية البشرية مايتبعش لايڤات الملولي و نزار و ندى حاسي و القايدة غيتة و الشكح و الشاخدة و غيتة قطر و صوفيا طالوني و مي نعيمة ! راه هادو هوما النجوم لي كايشبهو لينا

مايمكنش تطلب من شعب يحتل الرتبة 122 فمؤشر التنمية البشرية مايتبعش لايڤات الملولي و نزار و ندى حاسي و القايدة غيتة و الشكح و الشاخدة و غيتة قطر و صوفيا طالوني و مي نعيمة ! راه هادو هوما النجوم لي كايشبهو لينا
سهام البارودي – كود//
كاينين جوج ديال الياجورات كايتبنى بيهم مؤشر التنمية البشرية : واحد- واش عندك مواطنين كايعيشو مدة طويلة و بصحة جيدة و هادشي كايدخل فيه قطاع الصحة و جودة الخدمات لي فيه و جوج- درجة الولوج للمعارف و حياة كريمة ! فاش كاتقول انه بلاد كاتحتل الرتبة 122 من اصل 189 دولة فهادشي كايعني اننا ماشي السويد و لا النرويج ! حنا مالگري التقدم لي كانحققو فبزاف د المجالات الا انه مكلاصيين مع الدول ديال الله يحسن العوان لي مازال عندهم مشاكل فقطاع التعليم و انه بزاف ديال الناس يحققوا واحد النيڤو ديال القراية و الوعي !
هادشي علاش كايجيني غريب جدا انه شي ناس كايمصصو الحامض فاش كايشوفو درجة تعلق الشعب بالنجوم الجدد : الملولي ! نزار ! ندى حاسي! الشكح ! صوفيا طالوني ! غيتة قطر ! مي نعيمة هادو راه شخصيات كانت من ديما فالمجتمع المغربي ماشي عاد بانت ! بغينا و لا كرهنا بالنيڤو ديالهم التعليمي البسيط ! الضعيف ! بالجهل ديالهم ! بالردائة لي كايروجو ليها راهم كايشكلو مكون كبير من مكونات الشعب المغربي ! مي نعيمة راه هي ديك خالتك لي فالعروبية و لا جارتكم لي كانت كاتسيفط معاك الوصلة د الخبز و غيتة قطر هي بنت دربكم لي مشات لقطر و الطالوني هوا الدري لي خدام عند الفرناتشي و كاتعيطو ليه فالدرب ” مصيطيفة” و الشكح هوا المراهق لي كايعاني من الاهمال الابوي … بلا مايجي شي واحد يحل فمو و يقوليك ديك الهضرة ديال ” واك واك آش هادشي خرج لينا ” واك واك هادشي راه بفعل انهيار منظومة القيم” “واك واك هادشي حيت المقررات التعليمية هزيلة ” … نو نو نو ! ارفض اننا نكذبو على راسنا !
ماعمرنا كنا السويد و لا الدانمارك باش نتخايلو بلي وقعات شي ردة اجتماعية و اقتصادية و تعليمية و اخلاقية عندنا ماعمرنا كنا كانقراو الكتوبة فالطوبيس و التعليم ديالنا كايخرج لينا العلماء لي كايخدمو على اللقاحات! ! لا ! لي وقع توسامبلومون انه جات شي حاجة سميتها ” الادسنس” و وولا بنادم يقدر يصور الفلوس باستعمال تيليفون و انترنيت و سوة او ترمة او خرزة او بيسيبس تريسيبس فحالة الملولي ! ولا ممكن اليوم للهبيل ديال الدرب لي كان كايصلاح غي للتنمر ديال ولاد الدرب انه يدير قناة و يدخل الفلوس بالهبال ديالو ! و الحياة صعيبة آ ولد عمي ! بنادم متبوع بالضو و الما و دانون و ليكوش ! و حتى لي مامتبوعش بهادشي راه باغي يحسن الوضعية و يدير تاهوا الميرسيديس و الصالون و الڤيلا بلابيسين ( اسماء بيوتي نموذجا)
الفلوس مابقاوش مشروطين اليوم بالقراية و لا الخدمة و لا تامارا و لا المغامرة ! اليوم بفضل الادسنس تقدر تصور الفلوس بكالاخك ! بجهلك ! بسذاجتك او كيما قلت سابقا بسوتك  يعني فحال داك الشعار ديال ماكدو لي كايقول venez comme vous êtes ! تا الادسنس اليوم كايقوليك آجي كيما نتا ادخلوها بسباطكم و غايجيب ربي التيسير  !
زد على هادشي انه السوق كاينة و المشاهد واجد و باغي ! باغي بكامل قواه العقلية يتبع اللايڤات د الملولي و الشكح و باغي بكامل قواه العقلية يطلع لايڤ مع صوفيا طالوني و باغي و هوا بكامل قواه العقلية يسيفط الفلوس لمي نعيمة باش تجوج ولدها يونس ! ترفيه ! تبرگيگ! قلة مايدار …انا بالعكس كانشوف بلي الفضاء السمعي البصلي بفضل الادسنس عاد ولا كايشبه لينا و كايقرب للواقع ديالنا ! شوف غي مجال الاشهار شكون اليوم خدام فيه بكثرة ؟! اليوتوبورات و التيكطوكورات ! كبار الشركات ديال الماكياج كيفضلو دير ليهم يوتوبرة الاشهار على انهم يعيطو لممثل و لا مغنية حيت الريتش لي عند اليوتوبرة ماكاينش عند يماه شي ممثل ! اليوتوبرة لي غي بمقلة مصدية و زربية منسولة و بانيو فشي سطح ديال السكن الاقتصادي كاضرب نص مليون مشاهدة فنهار ! وا سير نتا دير ليهم التاريخ لي ماقراوناش ! تاشمن تاريخ واشمن جغرافية بنادم التاريخ لي قراوه و ماعارفوش بقا ليه غا لي ماقراوهش ليه!
اما ديك الهضرة ديال ” واش كنا هاكا و لا عاد ولينا ؟” كانظن بلي الجواب ديالها واضح ! هاد اليوتوبورات و التيكطوكورات راه واليديهم مغاربة و جدودهم مغاربة ! واش كون كان الاب دكتور فعلم الجينات و الام استاذة باحثة فعلم النباتات و الجد خريج القرويين كنتي غاتلقا بنتهم كاتكوز فتيكطوك على اغنية  الشابة وردة الشارلومانطي “بغيت من يطرضگلي شعري”؟!
لا!

موضوعات أخرى

19/03/2024 08:00

بن عبو لـ”كود”: موجة حر استثنائية فبلادنا وهاد السيناريو المناخي كيزيد تطرفا عام بعد عام وهادشي يؤكد أن الصيف الجاي غادي يكون حار وجاف وصعيب

19/03/2024 05:00

جورنال “الدايلي مايل ” بغا يحبس الشائعات لي كتسركل على الأميرة كيت: شهود شافوها كتدور مع راجلها وولادها

19/03/2024 03:00

مرض نادر كينتاشر فالجابون بطريقة كتخلع.. والعلماء مقدروش يعرفو الأسباب ديالو