محمد سقراط-كود///

كاين واحد التسيب خطير في مجال الدراجات النارية، هاد التسيب الدولة لي بداتو والمواطن مستغلوا راه كيموتوا بسبابو بزاف ديال الناس وآخرين كتدمر حياتهم، بحال البنت لي شفرها واحد مول سي تسعين وتبعاتو بطوموبيل صدقات قاتلاه، أو بحال البوليسي ديال كازا لي صدق قاتل روح وهابط للحبس والأثر ديال هادشي ماشي غير عليه هو بوحدو بل شمل الأسرة والعائلة ديالو لي حياتهم حتى هوما غادي تقلب ويتكرفصو ويتم التنمر عليهم وعلى ولادهم، طبعا هادشي ماغاديش يتقارن بمعاناة الأسرة لي فقدات ولدها الشاب لي كان هاز معاه جوج بنات وغادي عافط ومابغاش يوقف للبوليس حتى تبعوه ووقعات الكارثة المدمرة لأسرة الضحية والبوليسي، وغادي تنعاكس حتى على حياة بزاف ديال المغاربة لي يقدرو يتعرضو لكريساج أو سرقة أو مضايقة ويهرب الجاني بموطور ويشوفوا بوليسي دراج ويقوليك تبعو نتا نيت، لاش غادي نغامر بحياتي وحياة ولادي والأسرة ديالي، في المقابل كاين مواطنين كثار هاد الماطر ديال الشينوا هوما لي عتقوهم من البطالة ونقصو عليهم مصاريف التنقل وتكرفيص الطوبيسات والطاكسيات، وفكو العزلة على مناطق نائية في المغرب كانو الى بغاو يمشيو غير للسوق خاصهم بغل ولا حمار ويديرو نص نهار في الطريق، دابا موطور شينوا بمية وربعين الف ريال راه كيقضي غاراض للدوار كامل.

أولا خاص الدولة تحرص على أن تاواحد مايركب على موطور بلا مايكون حافظ الكود ديال الطريق يعني خاص بيرمي، وقبل من البيرمي خاص تطهير هاد القطاع من الفاسدين والرشايوية راهم دايرين عصابة بلا رشوة ماتشدش البيرمي، عاد من بعد يدوزو لهادشي ديال الماكينات والوراق، راه خاص بعدا مول الموطور يعرف فوقاش يوقف وفوقاش يزيد وأن قانون السير راه ماشي خاص غير بالطوموبيلات بل حتى بالماطر والبيكالات والراجلين، أما الى بقات الوقت سايبة بحال هاكا راه باقي غادي يتعاودو هاد الحوادث كل نهار وبأبشع الطرق، مايمكنش الدولة لي كتحقق الإنتصارات الديبلوماسية على ألمانيا وإسبانيا ولي تغلبات على كورونا أنهم يغلبوها مجموعة من المراهقين راكبين على سي تسعين محمقين بلاد على قدها وزارعين فيها الرعب، وغير القاصرين مضصرينهم واليديهم، ماخدام ماردام مكيقرى ماداير تكوين وشارين ليه موطور يدور بيه في الزنقة ويعمر بيه قابلت الليسيات ويقلب بيه على المناتيف ونهار يتشد الى مخبيين شي فلوس يجبدوها باش يفاصلو عليه وملي يمشي للحبس يتهلاو فيه بكاع الشهيوات واللباس، وبنادم مشدزد على بورطابل دألف درهم وكتلقى مو وختو جايبين ليه ترس ديال وينسطون ولا مارلبورو في السيمانة،موظف برا ومكيكميهش، رئيس المعقل وكيكمي ماركيز.

هاد النوع مابقاو يخافو من حبس مايخافو من بوليس النشاط هو يلعبو معاهم الرالي في الطريق والمتضرر هو المواطن البسيط شاري موطور شينوا كيمشي ويجي بيه للخدمة وفين ماتكون شي حملة كتجي فيه هو اللول، واش المغاربة زعمة فيهم شي جين ديال عدم إحترام القانون طبعا لا، راه الدولة لي حالاها على ربعة، المواطن المغربي كيركب على بيكالة في الناظور بلا كاسك هو نيت غير كيدخل لمليلية كيدير الكاسك ديالو خوفا من الغرامة، كيقطع الشانطي منين مارشقات ليه كيدخل لمليلية أو سبتة كيولي يحتارم القانون ويقطع من الشراطي، أنا نيت أول وصية وصاوني في الدخلة دمليلية هي واياك ماتقطعش من الشراطي حيت الى شافوك غادي تخلص بروصي، وكذلك المغربي في أوروبا عموما راه كيحتارم القانون حيت نظام الغرامات كيفرع الجيب وفعال، الفالطة بالكبوط، وهادشي لي خاص يدار هنا حيت راه هاد السيبة ديال هاد البراهش كثيرة، وهاد المظاهر ديال تلاتة دالبلايص في موطور أو غير بلاصة بلا كاسك بلا احترام قانون السير راها جريمة في حق مول الموطور وفي حق المواطنين والبلاد وماخاسش التساهل أبدا مع هادشي.