كود سبور//

زوران مانولوفيتش، مدرب الوداد البيضاوي، ما حملش فؤاد الصحابي يبقى معاه مدرب مساعد، وقرر يطيرو اليوم الجمعة قبل الماتش ديال الكلاسيكو لي غادي يجمعه بالجيش الملكي نهار الأحد المقبل بملعب مركب محمد الخامس فالدار البيضاء، برسم الدورة السابعة من منافسات البطولة.

مانولوفيتش اجتمع مع سعيد الناصيري، رئيس الوداد، وطلب منو يبعد الصحابي، لحقاش ماتفاهمش معاه وكيختلف معاه في مجموعة من الأفكار.

وسبق لهاد المدرب أن اشتكى من وجود مشاكل بالوداد، بعد الفوز بربعة على أولمبيك خريبكة نهار الأربعاء لي فات.

هادي المرة الثانية، لي كليطلب فيها المدرب زوران إبعاد الصحابي من الطاقم التقني ديالو بعد الديربي العربي كونتر الرجاء البيضاوي وعاود رجعو الناصيري بعد الإقصاء من البطولة العربية.

مانولوفيتش اختار عبد الإله صابر باش يخدم معاه مدرب مساعد نظرا لتجربته وقدرته على تقديم الإضافة. ومن المنتظر أن يعرف الطاقم التقني بعض التغييرات في الأيام القليلة المقبلة.