كود سبور//
صبحت صفقة انتقال الدولي المغربي بدر بانون من الأهلي المصري إلى قطر القطري مهددة بالفشل بسبب مشاكل صحية عندها علاقة بإصابة بفيروس كوفيد- 19، ليكان منعو من اللعب مع المنتخب المغربي فكأس افريقيا الماضية ومنعو أيضا باش مايلعبش مع الأهلي لمدة ديال أشهر.
تقارير إعلامية قطرية كشفت فهاذ الصباح على أن الصفقة ديال بدر بانون صبحات مهددة بالفشل، بحيث أن مؤسسة “أسبيتار” ديال الطب الرياضي قطر، وقفات التصريح الطبي ديال النجم المغربي بانون، والسبب هو أن اللاعب عندو قصور فالقلب بسبب تادعيات ديال اصابتو بكورونا قبل أشهر.
الخوف دابا ما بقاش غير من فشل الصفقة ديال انتقال بدر بانون لقطر القطري، ولكن صبح المشكل كبير بحيث صبح الخوف على الصحة ديال اللاعب وعلى المستقبل اللاعب حتى هو، حيث إلى بقى الوضع الصحي ديالو كيفما هو غيصعاب عليه يلعب وماكينش شي فريق غيزعم يوقع معاه، مع العلم أن بدر بانون كيتعتبر من أفضل المدافعين المغاربة والافارقة فالسنوات الأخيرة، وهاذشي راجع للتألق ديالو مع الرجاء الرياضي الفريق الأم ديالو وفريق الأهلي المصري.
