20/04/2024 07:00
“تيك توك لايت” منوض روينا.. المفوضية الأوروبية عطات للشركة 24 ساعة باش تعطيها توضيحات
سهام البارودي – كود//
لاشفتي الفيديو ديال وليدات ليوطي لي دوزو الباك بكل موضوعية غايبانو ليك وليدات ! مراهقين ! شباب! نقيين فحالتهم ! الدراري دايرين حسانات عاديين ! البنات لابسين حوايج عاديين! بعاد عن البهرجة و التحاسن ديال بالوطيلي ! كايهضرو على التجربة ديالهم مع امتحان الباكالوريا بطريقة معقولة ، بعيدا عن ديك الوجوه لي كانشوفوها كاتغوت قدام كاميرا شوف تيفي ” وااا ماخلاونااااش نقلو آ خويا ” ” بغينا نفرحو لميمة و لكن ماتشعاونوش معانا الأساسيييد آ خويا”
مقارنة بسيطة بين جوج فئات ديال الشباب دوزو الباك غاتعطيك توضيح على جوج ” مغربات” لي عايشين فيهم عباد الله! مغرب فيه شباب زوينين كايهضرو بلا مايخرج ليهم التشاش من فمهم و ماكايدويوش گاع على شي حاجة سميتها النقيل ، و مغرب آخر فيه شي وجوه محروگة بالشموش دايرين شي تحاسن ديال الفرارج و كايطالبو الاساتذة يخليوهم ينقلو باش ينجحو.
علاش كاينين هادو و هادوك ؟
الجواب باين حيت باوات هادوك قبل مايولدوهم فكرو ليهم فمستقبلهم و وفرو ليهم الظروف الملائمة باش يعيشو فأجواء صحية، يدوشو كل نهار، ياكلو مزيان، ينعسو مزيان و يقراو فسيستيم مزيان لي مايخليهمش يعتابرو النقيل وسيلة للنجاح ! باواتهم فكرو ليهم فحياتهم و قرايتهم و مستقبلهم قبل مايجيبوهم للدنيا و خططو ليهم مزيان ! و ولدوهم عن حب. ماشي بالضرورة يكونو باواتهم خانزين فلوس لا ؟ غاتلقا الاغلبية من اسر متوسطة باواتهم ناس قراو على راسهم و خدمو و شدو مناصب مزيانة لي توفر ليهم و لولادهم عيش كريم !
ماشي نتا باك ماقاد تاعلى راسو و مجوج بمك و والدكم نتوما خمسة ديال النفوس و طالقكم ! باغي الدولة تقريكم و تكسيكم و تعطيكم الأدوات و داويكم و تخدمكم ، ايه و نتا آ الواليد ؟ كاتعرف غا تحمل مرتك ! كاطير غي فالتحمال ؟ كاين شي فلوس !؟ شي بيزنيس ؟ شي مستقبل !؟ موجد شي حاجة لدوك الدراري و لا غا مغامر بيهم كاميكاز ؟
كون كل أب مستقبلي و كل أم مستقبلية حيدو منهم ديك النزعة الأنانية و فكرو قبل مايولدو فشنو خاصهم يوفرو لدوك الاولاد كورا گاعما يكون داك الفرق لي شفت فالفيديوات، حيت هاداك الفرق هوا نتيجة ديال ثقافة ” كولا يتزاد برزقو ” ” نولدهم باش نلقا لي يخدم عليا ” ” نولدهم باش يمدو ليا جغيمة د الما باش نكبر ” ” نولدهم و خاص الدولة تعطيني باش نصرف عليهم فحال ففرانسا و اوروبا ” علاه الدولة هي لي كانت حالة رجليها ؟ علاه نتا دوك الگناطح عندك كايشبهو لولاد فرانسا ؟
كاين واحد العالم الله يذكرو بالخير كان قال بلي باش تكون الثروة فشي عائلة خاص الواليدين يخدمو بما فيه الكفاية بحيث انه ولادهم موراهم يكونو قادين يعيشو بلا مايحتاجو للخدمة ( طبعا ماشي ولادهم يگلسو تيتي نيني و لكن مايبداوش حياتهم من الصفر) بحيث انه فاش تموت نتا كأب تخلي لولادك دار، و تخلي ليهم مشروع مدر للدخل و تخلي ليهم خدمة او حرفة لي غاتكون نتا لي صرفتي عليهم باش وصلو ليها، هادشي غايخليهم نهار يخدمو دوك الفلوس لي غايجمعو غايزيدو يكبرو بيهم الثروة لي جمعتي نتا و يخليو تاهوما لولادهم باش يعيشو!
ماشي نتا مقلش الودنين ! كاتولد الولاد ماقادش عليهم ! كاتموت ماكاتخلي ليهم تاخرية لا ورث لا رزق لا خدمة و لا كاتولي نتا بكرك عالة عليهم فاش كاتكبر عوض يبنيو مستقبلهم و ثروتهم لولادهم كايولي خاصهم يصرفو على الواليدين و الجدود !
تاكاتبقاو كاملين على الضص ! كاتورثو لولادكم الزلط و الميزيريا !
