محمد سقراط كود ////

نقاش سياسي كبير هاد ليام داير فالمواقع الإجتماعية حول كاسكيطة نبيلة منيب ،لي قدرات من خلالها ترجع لواجهة الأحداث ولصفحات الجرائد والمواقع الإخبارية، وبينات للمغاربة كاملين أن ماشي غير بنكيران لي يقدر يخلق الحدث بسروال شراه من باب الجامع ، وهادي موهبة كاينة غير عند الزعماء الكبار ، غير هو الفرق أن بنكيران كيديرها بعفوية ويصرفها بذكاء، وطاطا نبيلة كتديرها بعفوية وتصرفها ببلاهة ، ومن غير هادشي بحال هاد الأحداث كتبين مستوى النقاش السياسي فالمغرب ، وكيفاش كيتحول سروال قندريسي ولا كاسكيط لحدث بارز، كثر من حدث اقالة عمال وولاة ومسؤولين مؤخرا ، أو أحداث أخرى أكثر أهمية.
طاطا نبيلة على عكس باقي السياسيين ( وهي عكسهم حقا) نهار كتبان فواجهة الاحداث ففي الغالب غير بسباب شي حاجة سلبية لي كتسبب ليها انتقادات الناس لي مكيمشيوش للعطة ولي مقاريينش ، والنهار الخايب كتصاب حاضرة ، سياسية مشهورة فقط بهفواتها وخرجاتها البيزنطية وطبعا بأناقتها ومقتنياتها الثمينة ، وحاليا ولات مشهورة بسيميولوجية بعد القرائة لي دارت لشعار فريق اليانكي ورداتو كيعني نبيلة ويوسف ، وهذا تفسير قود من الزلة ، ولكن هانية غير طاطا نبيلة هاديك .

هو الصراحة نبيلة ماشي أول وحدة ضد الإمبريالية وخارجة تحتج ضد سياسات ميريكان ومع ذلك لابسة أحد رموزها ، راه الزرقاوي كان كيحارب ميريكان فأرض الواقع بسبرديلة نايك ، والعديد من الميليشيات حاربو الإمبريالية بالإم 16 عوض الكالاش الثورية ، غير هو بنادم كيدير السياسة خاصو يرد البال شوية للرموز ويتجنب صداع الراس ، وحقا راه مكاينش حوايج يسارية ، واخا أغلب الملابس كتصنع فبلاد ماوتسي فمكتعنيش أنها حوايج تابعة للحزب الشيوعي ، غير هو الإنسان إلى كان حامل لإديولوجية معينة وكيدافع عليها ليل نهار على الأقل مايساهمش فتبخيسها بهاد الطريقة ، أي واحد عارف كيفاش كيتصنعوا ملابس الماركات الكبيرة فمعامل بنغلاديش والصين ودول أسياوية أخرى فظروف ديال العبودية بأجور يالله كتكفيهم يبقاو على قيد الحياة حتى لآخر الشهر ، وبإقتنائك لهاد الماركات راه كتساهم فإطالة أمد عبودية دوك الناس وفالأوضاع المزرية لي كيعيشوها .

من غير هادشي السياسيين فالعالم كيكونوا عندهم ناس كيتشاورو معاهم ملي كيطراليهم شي بلان غادي يأثر سلبيا على شعبيتهم ، وبحكم أن نبيلة سياسية من الطراز الحديث والحداثي والمتحدث ، فراه خاص تمشي على هاد المنوال ، غير هي مسكينة فكل مرة كتجي تصلحها كتطبز ليها العين كثر ، على الأقل تبقى غير تشاور مع لي دايرين بيها كنظن بأنهم يقدروا يطبزوها حتى يعياو ولكن ماغادي يوصلوا لدرجة تفسير شعار اليانكي على أنه كيعني نبيلة + يوسف = الإلتزام والمعقول