عفراء علوي محمدي- كود//
“كورونا” مزال كتحصد أرواح الشخصيات العامة والسياسية، حيت غير اليوم توفات أول أميرة بفيروس “كورونا” المستجد، وكيتعلق الأمر بالأميرة الإسبانية ماريا تيريزا، اللي عندها 86 سنة، واللي صبحات أول عضو فعائلة ملكية كيتوفى بالفيروس فالعالم كامل.
وعلن الأمير سيكستوس هينري، الأخ الأصغر للأميرة، فتدوينة ليه، بللي الاخت ديالو توفات بسبب هذ الفيروص اللي صبح يهدد العالم.
وكتنتمي الأميرة لعائلة بوربون، وهو فرع ثاني عن العائلة الملكية الإسبانية، وكتنحدر من سلالة كيبتيان الفرنسية.
واليوم تاني علنو تقارير إخبارية فرنسية على وفاة الوزير الفرنسي السابق في حكومة فرانسوا فيون، باتريك ديفيدجيان، بعد إصابتو حتى هو بفيروس “كورونا” المستجد.
الوزير اللي كان كيشرف على قطاع الصناعة كان كيشغل منصب رئيس مجلس مقاطعة أوت دو سين، وهي المنطقة اللي تفشى فيها الوباء بشكل ملحوظ ففرانسا.
