محمد سقراط – كود//

تعرف غير الدخل الفردي فالمغرب واصل شحال وإينا رتبة عالمية حنا، غادي تعرف أن المغرب من الدولة لي الأفراد ديالها مقودة عليهم واخا راه البلاد كتزيان وكاين مشارع كبيرة لي خلقات وغادا تخلق فرص شغل، ولكن مع ذلك المواطن المغربي وكيفاش عايش بالخدام بالبطال يراه غير مقاتل مع الزمان وصافي، والطبقة الوسطى ديالنا كتعيش كطبقة فقيرة بينما البرجوازية الصغرى هي لي كتعيش كطبقة وسطى، لذا عادي أنك تشوف شباب مغاربة مغامرين بحياتهم فالبحر من أجل مستقبل أفضل.

لي ماشي عادي هو تشوف هاد الثوتيق ديال عمليات الهجرة، كتلقى فيديو للدراري فوقاش ركبو وفيديو ليهم فالطريق وفيديو آخر لفوقاش وصلو بيخير وعلى خير، وفي شي حالات غير فابور كاع، علما أن بزاف من دوك الدراري ردوهم فالبلاصة بحال شي كومبارس ديال شي فيلم عندو غرض محدد، حيت الحريك كاين ديما وعقود هادي ماشي غير دابا، واخا راه فرق كبير بين لي هاجرو بكري وبين لي كيهاجرو دابا لي بزاف منهم ماباغي لا يخدم لا يردم لا هنا لا لهيه باغيها باردة وصافي، وباغي غير يطرافيكي ويعيش الحياة بحال شي فيديو كليب ديال 69.

يقدر يكون المغرب مستهدف من ورا هاد عمليات الهجرة الموثقة بالفيديو، لدرجة بنادم ولا كيتخايل راه كاينة موجة هجرة جماعية، بحال إلى حنا فالحرب، أييه كاينة مشاكيل  فالبلاد لي تخلي الواحد يهاجر أو ينتاحر ، ومحاربتها ماغاديش تكون بالبيانات والبلاغات وتهديد الصفحات الفايسبوكية، راه كان ممكن لدولة بحال المغرب أن مواطنيها مايكونوش بحال إلى محبوسين فيها، ويمكن ليهم يسافرو فأي وقت ولأي بلاصة ويرجعو لبلادهم ، وإلى غادي يكون للدولة شي هدف خاص يكون هو تولي الزودياك توقف فالبحر ومايركب فيها حد واخا يزيدوهم لفلوس، أما ماحد زودياك كتوقف غير جوج دقايق وكيمشي بنادم يجري يركب باش يهرب من هاد البلاد، فراه الموشكيل فيها ماشي فهادوك لي مستهدفينها وباغين يبينو بحال الى كاينة هجرة جماعية.