كريم الصوفي – كود//
[email protected]

واحد المؤثر معروف ف منصة “تويتش” ديال أمازون واللي متخصصة ف لايفات ديال گيمز، هاذ الايامات فرح شاب مغربي من المتابعين ديالو. المؤثر المعروف ب لقب “ميزكيف” شرا لهاذ المتابع ديالو بيسيات ساوية 5000 دولار، وعطاه من الفوق 5000 دولار أخرى فلوس.

الطالب المغربي كان كيتفرج ف لايف غير من التيلفون ديالو وكان باغي غير بيسي عادي يعاونو ف قرايتو. والمتابعين غير شافو لاليست ديال الطلبات البسيطة وبداو كيدفعو اشتراكات وتبرعات وقدرو يجمعو مبلغ محترم والمؤثر “ميزكيف” زاد من عندو.

لاليست ديال الهدايا، حسب موقع “egames.news”، شملات جهاز كمبيوتر “One True King” خاص ب گيمينگ وجوج شاشات LCD وبيسي بورطابل اخر “Surface Pro”. الطالب المغربي كان طالبها غير صغيرة، باغي غير بيسي رخيص بقيمة 220 دولار، وماوس Razer ، وجهاز Samsung، ثمنهم تقريبا 500 دولار، والمؤثر دار معاه شرط وحيد هو يتعهد باش ما يفرطش ف قرايتو..

https://www.egames.news/noticias/Mizkif-un-streamer-de-Twitch-regala-una-costosa-PC-y-5000-USD-a-un-seguidor-20211226-0017.html