وكالات //
نهار الثلاثاء الفايت قتل دري صغير فميريكان فعمرو يلاه 6 سنين، ختو اللي صغر منو بعام، بالفردي ديال باهم.
وسائل إعلام محلية، قالت بللي هاد الحادث وقع فمدينة “مانسي” (Muncie) فولاية إنديانا، وبسبابو البوليس شدو الوالدين بتهمة إهمال وسوء مراقبة وليداتهم، وتعتابرو السباب ديال هاد الحادث المأساوي، وبداو معاهم لونكيط.
الدري الصغير هز الساروت ديال ماريو باباه، واستاغل بللي ماماه كانت ناعسة، وخدا الفردي من وسط الپلاكار وتيرا فختو الصغيرة وجاتها الضربة ديريكت فالراس، خزوها لصبيطار “IU Health Ball Memorial” وتما تعلنات الوفاة ديالها.
#BREAKING: A 5-year-old girl has died after a shooting in Muncie. Police say they responded with EMS/Fire to a home in the 2800 block of S. Monroe & learned a gun had been discharged, striking her. She was taken to BMH, where she was pronounced dead. @FOX59 @CBS4Indy pic.twitter.com/uCc7RRiYWg
— Courtney Spinelli (@CourtSpinelliTV) July 26, 2022
هاد الدري كانو يالاه داوه والديه، لواحد البلاصة خاصة باش يتعلم التير بالفردي، وباينة تأثر بهادشي، وبغا يجرب بوحدو ووقعات الكارثة اللي صدمات كلشي خصوصا جيرانهم.
