كود هناء ابو علي ///

لمغاربة مطلعينها على حكومة بنعرفة الجديدة. واخا نزلات من 39 وزير ل23 واخا جمعو وزارات وتعاودات الهيكلة. واخا حيدو شي وجوه وجابو 6 لوجوه جداد ومع ذلك كانت نسبة الشدان كبيرة البارح بعد الاعلان على تشكيل الحكومة. 

حتى حد ما داها فتصريح رئيس الحكومة اللي قال باللي كضم “كفاءات جديدة إضافية” وانه “تم العمل على تقليص العدد وتقوية الحضور النسائي والتشبيب، مع الحرص على ضمان نجاعة أكبر في العمل الحكومي والرفع من أدائه”. وزاد باللي كلشي عازم “على مضاعفة الجهود، خدمة للوطن والمواطنين”.

البارح كلها وفين كيشد. شي شد فادريس لشكر وحزبو الاتحاد الاشتراكي اللي بقى يزقزق حتى طلع بوزارة وحدة وقال اتحاديون معاه فالحزب وماشي فالتوجه باللي “شركة ساهام” عندها جوجت الحقائب في اشارة الى وزارة الصناعة والتجارة اللي عند مولاي حفيظ العلمي ووزارة السياحة والنقل الجوي اللي عند نادية فتاح. باطرون “ساهام” والمديرة العامة اللي قبلات تتنازل على صالير ب50 مليون ستنتيم للشهر باش تخدم فالقطاع العام وب5 مليون سنتيم. الاتحاد دا حقيبة العدل وخداها بنعبد القادر. الاتحادي الشاعر والصحافي حسن نجمي اختار التعليق على الحكومة بعبارة “يك يا وليدي كعكع يا زبيدة مع صورة شخصية الشعبيبة ف”الكوبل” اللي كانت جسداتها دنيا بوطازوت. 

واحد من اكثر التعاليق اللي عبرات على هاد الحكومة جات عبارة على مثال مغربي “حنا گلنا ليهم لحريرة حامضة وهما كيبدلو لينا لمعالق”. اي كيف كتبو بزاف بالفرنسية “تمخض الجبل فولد فأرا”. 

حكومة مشكلتها فرئيسها. وعد وما بدل والو. 75 بالمائة وجوه قديمة ولقليل الباقي جديد.  عطاو الوعود وصافي. الحكومة هاهي والكفاءة فين هي