كود اسماء غربي ////

العربي لمحارشي اللي متهم تزوير شهادة الابتدائي واللي ولى الرجل القوي فحزب الاصالة والمعاصرة قلبها تنگافيت هاد ليام. وفق مصدر “كود” فان لمحارشي اتصل برئيس جماعة ضاحية الدار البيضاء وهي جماعة دار بوعزة وطلب من شكري رئيسها اللي من حزبو يعرض على الامين العام حكيم بنشماش لشي موسم ديال التبوريدة كينظموه تماك.

طبعا ما يمكنش يجي رئيس مجلس المستشارين لنشاط صغير فغياب الوالي او رئيس الجهة او وزير…. واخا هاكا طلب ورغب ولكن ما نالش اللي بغى.

لمحرشي بغى يقولب رئيس الجماعة لانو دار هادي سيمانة عشا فدارو وحضروه كاع اللي ضد بنشماش. فيهم كاع مسؤولي الحزب فكازا. دابا بغاو صحاب بنشماش يبينو قوتهم. الساعة تقولبو.

المهم لمحارشي هاز تلفونو وكيقلب فين يعرض على امين عام حزب ولى مكروه من صحابو.