هناء ابو علي-كود//

نشر الموقع  السلفي “هوية برس” مقال دار فيه عنوان ان كود ناطق الرسمي باسم وكالين رمضان،وكايظنو انهم بهاد العنوان كايقدحو  و يسبو فينا، في حين بكل بساطة كنقولو ليهم، حنا موقع صحفي كنديرو الصحافة وكنقلو الاخبار، وعندنا بلاصة ف الموقع سميتها “اراء” وتما كننشرو اراء الكتاب و القراء بغض النظر على انتماءاتهم الفكرية، كاننشرو لعصيد و كننشرو لحسن حمورو و الا ارسلتو لينا حتى انتما ننشرو ليكم، ماشي مشكل،..

كايشرفنا نكونو صوت وكالين رمضان،المغاربة اللي اختارو مايصوموش، بغيناهم يمارسو حياتهم بشكل عادي بلا مايخافو من فصل جنائي حطو المقيم العام ليوطي ف العشرينات من القرن الماضي استهزاءا بالأهالي ليزانديجين..، وبلا مايخافو من الدهماء ، الا كنتو كتعرفو الدين مزيان فراه مافيهش شي عقوبة على اللي كايفطر رمضان سواءا كان مسلم بعذر او غير مسلم، حنا كايشرفنا ندافعو على الاقليات و الحريات الفردية.

حنا مغاربة مع الحريات وابدا واش ننشرو مواد تحارب فريضة الصيام،بل هي مقالات تناقش العقوبة الجنائية للمفطر ، كما تناقش كيفاش تحول رمضان من عبادة الى ظاهرة مجتمعية فيها الاستهلاك و التبذير و التعصب و الترمضين و التدين الزائف.

مرة اخرى، حنا مكنتبناوش خط الحادي، خطنا التحريري واضح و راها موجود ف الموقع الا بغيتو تقراوه. ماكنشجعوش على الالحاد ولا الدعارة و الخمر، ماعرفناش فين جبتو هادشي، الا اذا كنتو كتأمنو بلي الحرية كتعني هادشي مباشرة فراه هادا مشكل عندكم يمكن ف فهم شنو هي الحرية..

ماكنحاربوش عقائد المغاربة كما جاء ف المقال، بل نقول انه المجتمع المغربي راه مافيهش غير عقيدة وحدة، كاين يهود و مسحيين و ملحدين و غيرهم من الطوائف، وكنتمناو الدولة تكون محايدة بينهم، و ايضا المجمتع الاغلبي يحترم الاقليات و طقوسها، وهنا ف الحقيقة راه كندافعو عليكم ايضا، اذ كونكم اسلاميين او سلفيين، ربما تكونو براسكم ضحية هاد الفكر الاغلبي، سواءا من الدولة اللي غادي تعتبركم خرجتو على الاجماع و خط التدين اللي سطرات وهو المذهب المالكي، وهنا فين كاين الخطورة.

مقالات كافر مغربي، هي مذكرات معروضة قانونيا في المغرب، و الكاتب اختار هذاك الاسم و هي نصوص ادبية، تنشرات ف كتاب و تبعات بزاف خلال معرض الكتاب.. وحنا كننشروها باتفاق معه.

ماكننشروش مفردات ساقطة، بل كنكتبو بالدارجة، والا كتعتبرو الدارجة ساقطة فهذاك مشكل كبير اخر.

حنا مع الحرية، داكشي علاش دافعنا على القباج يترشح ف مراكش وخا مختلفين معه، ودافعنا على الديمقراطية ف البلاد ملي تم استبعاد بنكيران من رياسة الحكومة وخا مختلفين معه، دافعنا على الحريات الفردية. ناس كايمارسو حريتهم و حياتهم و ماشي شغل شي حد ف اللي كايديرو بغض النظر على كونهم شخصيات عمومية خطابها متناقض مع ممارساتها، وهو ماعتبرتموه سابقة ان كود كتدافع عليهم فواحد المقال سابق لكم..

هادشي كلو ، حنا كنحاولو نكونو صوت الجميع، الاغلبية و الاقلية..

نعم، ماعجبناش هاشتاك ستر بنتك، مابغيناش شرع اليد و التدخل ف طريقة لبس الناس من طرف الاغلبية ولا الاقلية و لا الدولة، كل وحد يلبس مابغا، لو فكرتو مرة اخرى كون اتفقتو معنا حيث مفهوم الستر راه غادي تختلفو فيه غير بيناتكم، واش حجاب ولا نقاب ولا برقع..؟ هاذ الفكر اللي انتما غاديين فيه ديال التطبيل لممارسات “الدهماء” و دعم الجانب الديني المتزمت للدولة راه انتما غادي تكونو اكبر ضحية ليه، حيث حتى انتما بكونكم سلفيين متبعين السعودية ف الحوايج و المظاهر و المذهب و حتى توقيت الصيام  و الافطار  شي مرات، ف كتعتبرو اقلية.. و النهار ملي تمشيو تعيدو و وتفطرو مع السعودية و يتعداو عليكم هاد الدهماء ، انكونو اول من يدافع عليكم حيث  بكل بساطة هوية المغاربة ماشي وحدة كما يوحي اسم موقعكم.. راها هويات و لغات و اديان و عقائد ومذاهب..والمشاكل كتبدا ملي هوية وحدة كتبغي تسرط الهويات الاخرى..