محمد سقراط-كود///
“لخوانجية إذا دخلو جامعة أفسدوها وأخرجوا أعزتها أذلة” هادشي لي وقع لواحد الأستاذ جامعي ميريكاني كان كيقري في الأخوين، هاد الأستاذ مثلي وعندو شريك ديالو حتى هو كان أستاذ جامعي بالأخوين ومتبنيين جوج وليدات، هاد الكوبل راهم ماشي بحال لي كيتخيلو بعض المغاربة بلي المثلي هو صوفيا طالوني وأدومة، ناس عاديين بحالهم بحال أيها الناس وحيت عايشين في مجتمع حر مافيهش الدخول في الصحة وكاينة قوانين كتحميهم وعاطياهم الحق في الزواج والتبني، جاو للمغرب تقبلوا يقريو في الأخويين، هاد الجامعة لي كانت بالنسبة لينا معقل الحداثة بحكم أنها منقية من الهايش مايش وعقليتهم،راه ملي كتسمع الأخوين كتجيك صورة الجامعة الأمريكية في مصر ولا لبنان كيفاش كتبان في الأفلام كقطعة من العالم المتحضر وسط التخلف، وهاكا كانت كتبان لينا الأخوين وإفران كلها.
غادي ينوض واحد الأستاذ جامعي مغربي كتاكلو الغيرة على مؤخرات وقضبان طاقم التدريس في الجامعة وشنو كيديرو بيهم، وبالنسبة ليه مؤخرة الرجل يخرى بيها فقط والقضيب للإنجاب لا غير، ناض هاد السيد وقلب على سمية هاد الأستاذ الميريكاني في كوكل ولقى أن الشريك ديالو بالإظافة إلى أستاذ جامعي يهوى التصوير وخدا صور فنية للأستاذ راجلو وهو عريان ومحطوطة في الأنترنيت كفن، ولكن بالنسبة لأستاذ جامعي مغربي الهواية الوحيدة ديالو هي يدخل سوق كر عباد الله، أو طاشرون في أحسن الأحوال، خدا الصورة وصاوب ملف بي دي إف وفرقوا على إدارة الأخوين وعلى التلامذ و أولياء الأمور ديالهم، وشهر بالأستاذين الميريكانيين وهلل وأرغد وأزبد وكيفاش مؤسسة جامعية مغربية تقبل يقريو فيها جوج مثليين كوبل من بعد مكيكملوا الدروس ديالهم كيمشيو للدار يفيبريو عرش الرحمان، تشهير واضح وتعدو غير هكاك على أستاد جامعي أجنبي غير حيت معندوش هو وياه نفس الطريقة في ممارسة الجنس.
حسب الأستاذ الأمريكي الإدارة تدخلات وجات من جيهة الميريكاني في اللول، واخا الأستاذ المغربي قاليه نتا راك خارق القانون المغربي وعندك الإخلال بالأخلاق العامة وسمى فيه بلي هو لي فرق تصاورو عريان في الجامعة،( بحال الى كيقلش ليه رجليه وسط الصالون عندو)، المهم جراتو الإدارة حتى تكالمات القضية ومن بعد ماتاخدو حتى إجراء في حق الأستاذ المغربي المبلي بعباد الله، ناض الأستاذ الميريكاني سول على القضية وكيفاش حتى مادارو والو مع المغربي شي شهر بيه وخرق معاه القانون المغربي وأذاه، دوز شي جوج سيمانات وهوما يجريو عليه واخا الكونطرا باقا ماسالات، السيد مكانش من العاكزين قصد السفارة ومشاو بحالو وشكا بيهم تم، حتى كتفاتجئ إدارة الأخوين بقطع الدعم الأمريكي عليها، واش ميريكان في عهد إدارة بايدن غادي تعطي الفلوس لمؤسسة جامعية كتمارس الهوموفوبية حتى لهادي لا، تعطيهم للنصرة وماتعطيهمش للأخوين.
حسب هاد الأستاذ الجامعي الأمريكي فجامعة الأخوين دخلو ليها مجموعة ديال الخوانجية هوما لي متحكمين في الأمور تم وغادين يردو جامعة الأخوين بحال دوك المدارس القرآنية ديال باكستان فين قرات إرشاد منجي، أما حتى المدارس القرآنية هنا في المغرب بزاف منهم متسامحين مع المثلية حسب تعاويد الطلبة، وقال أيضا أنه فين مكانت كتوقع شي حادثة ديال التحرش وتمشي الضحية للإدارة كانو منهم لي تلاموا كضحايا بسباب لباسهم أو حاجة خرى، يعني مكاينش فرق بين الأخوين والمسيد ديال الحومة، وهادشي أصلا لي قالت السفارة أنه كاين تحرش بالتلاميذ والأستاذة وباغين لفلوس ذيال بايدن من لفوق، يالله سيرو دابا تصافوا مع حماس وحزب الله باش تشدو الدعم من عند الدولة لي كتعدم المثليين باش يالله تكونوا غادين هو هاداك مع قناعتكم، لحد الآن إدارة الأخوين ضاربة الطم وحتى إتصالات موقع كود مارداتش عليهم، هاد السكوت كيعني أن هدرة هاد الأستاذ الأمريكي بصح، كاين فصيل ديال الخوانجيبة ختارق الأخوين وراه يخرج أعزتها أذلة حتى يردوها بحال شي جامع مشارطين فيه الطلبة فبني عروس.
