الحشيش اللي شدو البارح وتقتل فيه بزناس طلع عندو علاقة بالحشيش لي لقاوه فسيدي رحال و”گود” جابت تفاصيل العملية
سهام البارودي – كود//
هاد السيمانة بداوني اعراض الڤيروس و حتى انا فحالي فحال بزاف ديال المغاربة قلت فالاول بلي الاغلبية حيت دوشت و خرجت ضربني البرد و لكن ملي وصلت للنهار الثالت و كنت محتاجة اني نسافر اضطريت ندير الطيسط باش نعرف راسي واش مريضة بكورونا و تما لقيت راسي بوزيتيف !
بالرغم من أني كنت ملتازمة بالاجراءات الوقائية ! كان كافي انني نغفل مرة وحدة على الاجراءات و فديك المرة الوحدة لعقتها ! و لكن الحمد لله هانا كاندوز فترة النقاهة بيخير و على خير واش بفضل اللقاح ؟ بفضل المناعة ديالي الطبيعية ؟ او حيت اوميكرون ماقاصحش بزاف فحال الديلتا ؟ الله اعلم لي عارفة هوا انه اوميكرون لي دوزت انا فحال شي ترويحة خايبة فيها قوة الخنونة و شوية د الكحة و السخانة فالليل ! ولكن كانعرف ناس لي دازت عليهم كحلة زحلة و خرحو منها بالكشايف !
لي تعلمتو فهاد الدرس ديال كورونا هوا انه فعلا الاجراءات الوقائية و اللقاح راه هوما الاصل الى الانسان بغا يحفظ راسو من المرض ! غفل طارت عينيك ! و هادشي علاش مافهمتش علاش المغرب مازال ساد الحدود ديالو و مطرق عليه گاع البيبان فالوقت لي قطاعات كاتسوفري بزاف فحال السياحة و النقل الجوي !
السدان ماشي حل ! خصوصا دابا ملي المرض تعرف و الناس تلقحو و هاد اوميكرون صدق واخا سريع الانتشار و لكن ماقاصحش بزاف ! علاش سادين ؟ السدان حل ديال المعاگيز لي مافيهم مايفكر و يخمم و ينوض يتواصل مع الناس و يقنعهم بجدوى اللقاح و باهمية الاجراءات الوقائية و هبط للشارع نعام ا سيدي و لي ماداير الكمامة هبط عليه بغرامة و سير للقهاوي لي مادايرش التباعد سدها لباباه ! و تتحرك السلطة و يتحركو المسؤولين و تبقا البلاد محلولة ماشي هاد الحالة لي حنا فيها دابا لا ديدي لا الفانيدي ! حالات كورونا في ارتفاع و البلاد مسدودة !
لا رزقي بقا لا وجهي تنقا!