الرئيسية > آراء > لانتيرنيت بدلات كلشي.. حتى الطريقة باش كيبيعو الدريات لحمهم
21/10/2018 15:00 آراء

لانتيرنيت بدلات كلشي.. حتى الطريقة باش كيبيعو الدريات لحمهم

لانتيرنيت بدلات كلشي.. حتى الطريقة باش كيبيعو الدريات لحمهم

نهاد فتحي – كود//

سبحان الله، فاش خرج الاستجواب ديال الصحفي الهوليودي سيمو بنبشير كيتيري فيه على شي إعلامية و كيتسائل كيفاش تدير حتى كتركب فالطيارة بزنيز كلاص و كتهز صيكان كيتباعو بملايين السنتيمات و هي أعلى أجر كتشدو غادي يكون مافايتش خمسة ديال المليون، كنت يلاه دويت مع شي أصدقاء على تبييض الدعارة، زعما بحال داك الشي للي كيدار بخصوص فلوس مبيعات المخدرات باش ما تعرفش ماليها كيدارو ليها

ولاو طرق جداد بيهم الدريات كيطلعو فالسلم الاجتماعي بلاما يعرفو الناس منين كيجيبو الفلوس. أولهم مسابقات الجمال للي ممنظمينهمش مؤسسات رسمية، و تيعطيو ألقاب ما عندها حتى معنى بحال “ملكة جمال العالم لمضيق بيرينغ”. تيكونو وكالات تيعطيوهم هاد الدريات فلوس باش ينظمو ليهم حفلة و يجيبو الناس و صحافة الكارطون، و تيلبسوهم كسوة بحال حلوة لاكريم و تيحطو ليهم تاج بلاكي أور فوق الراس و تيصفقو عليهم، و بعد شهور كتوللي الدرية فجأة كتصوڭ سيارة فاخرة و كتتصور فإينستاغرام بصاك “بوي باڭ” ديال شانيل للي القليلة القليييييلة تيدير خمسة المليون و نص. و هاد ملكة الجمال ما كتشوفها لا فإشهار لا فمسلسل للي كيبرر بحال هاداك المدخول السريالي. و كيفما لمح سيمو بنبشير، الجواب عند هاداك للي كيصورها و ما كنشوفوهش.

واخا تكون كتدخل خمسة المليون للشهر بعرق كتافها، لا يمكن تشري داك الشي كامل بديك السهولة. خمسة المليون ما كتجيبش سيارة من نوع رونج روڢر و عشرات الصيكان بزبابل الفلوس و المجوهرات و الدار و مونطو بالفورير ديال الثعلب و كساوي د السهرات كتبارڭ و تكاليف جراحة التجميل لتكبير المؤخرة و القنانف. و مع إنستاغرام كثرو بحال هاد النمادج فالعالم، و كاين واحد الموقع كيفرشهم سميتوTag your sponsor، خصوصا بنات أوروبا الشرقية و أمريكا اللاتينية للي كيقبلو بشي ممارسات جنسية مقززة مع الخليجيين باش يخلصوهم بصاك بجلد التمساح و جوج د الليالي ففندق فاخر فدبي، باش من بعد يعيقو بيهم فمواقع التواصل الاجتماعي و يفقصو البنات اللي بدورهم كيوليو يحلمو بهاد الشي حيث كيصحاب ليهم النجاح كيتعبر غير بالمظاهر الخارجية ديال الثراء. آه آ ختي، دوك القصص ديال بنت تزعط فيها سعودي و بنا ليها باطيما و شرا ليها جوج طوموبيلات، راه غير أساطير، راه ما كيتزعطوش، كيمارسو على الدريات الويل الكحل عاد باش كيكحبو ليهم دوك الفلوس. ها للي كيبول فالبنت، ها للي كيخرا عليها، ها للي تيڭول ليها كولي ليا خرايا، ها للي تيضرب ليها فخاضها  بزيزوار باش ما تبقى تعجب تا واحد… ما تمشيش غالطة، و حتى لحققتي فالشوفة ديال مشاهير الإنستغرام دياولنا راه تقدري تلقاي فشي وحدات فيهم بزاف ديال الحزن بحالا كانت فالحرب و شافت الموت بعينيها. و من المواقع الغابرة ديال تبيض الدعارة، كاين واحد معروف متخصص فالسفر تيڭولو رسميا كيلاقيو غير البنات للي بغاو يسافرو مع الرجال للي باغين يحوصو بيهم، ركن تعارف زعمة. فاش كتدخل ليه، شنو كتلقى؟ بزاف ديال الدريات من العالم الثالث و دول الكثلة السوڢياتية للي مقودة عليهم، و رجال لاباس عليهم من الخليج و أوروبا الغربية تيكونو غالبا خايبين و شارفين و عندهم جوج أورو تيحركوهم فوق نيوف هاد البنات باش يتبعوهم. أي وحدة عارفها خدامة فصونطر دابيل و كتلقاها مصورة فجزر المالديڢ و لايحة التصاور فإنستاغرام، عرفها ضبرات على راسها فبحال هادوك المواقع على شي واحد يائس مفاهم معاها على شي ثمن ديال السيمانة.

بطبيعة الحال كل واحد يضبر راسو. و لكن فاش هاد الشي كيتحط فمواقع التواصل الاجتماعي للي معششين فيهم المراهقات، كي غادي تدير حتى تقنعهم بللي خاص يقراو باش يحققو الاستقلالية؟ و كيغادي تفسر ليهم أن هاد الدرجة ديال الثراء لا يمكن الوصول إليها في وقت قياسي غير بعرق الكتاف؟ كي غادي تقنعهم أن قيمتهم كاينة فشخصيتهم و دماغهم ماشي فحجم المؤخرة ديالهم؟ للي ضبرات على شي دجاجة بكامونها بصحتها، غير تحبس من الكذوب و ما تبقاش تڭول داك الشي غير خدمة و خير من عند الله حيث بغات و لا كرهات راه كتجر معاها برهوشات فهاديك الطريق.

موضوعات أخرى

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري

28/03/2024 23:30

جثة مجهولة كلاوها الكلاب فالطريق بين العيون وفم الواد دارت استنفار فالجوندارم

28/03/2024 23:00

الفيفا طالبو الصبليون يوضحو لهم تهم الفساد المالي الموجهة للرئيس السابق روبياليس وللمعتقلين فالقضية

28/03/2024 22:35

اشناهي المواد الغذائية الفاسدة اللي تشدات ف15 يوم درمضان؟ 402 طن فيها 106 من التوابل و60 طن من العصير و35 طن من لحليب و34 طن من السكر واتاي

28/03/2024 22:30

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة