سهام البارودي – كود//

مؤخرا فالحوارات ديالي مع الناس ديال العائلة او صحابي لي خدامين معايا كانلمس واحد الاستياء عام عند بزاف ديال الناس لي واعية شوية بالاوضاع الحالية…
و هاد الاستياء لادخلتي للفايسبوك و لا وسائل التواصل الاجتماعي غادي تحس بيه و تلمسو … شي حاجة ماشي هي هاديك. المناخ ماشي هوا هاداك ! الناس كاعية …
الفيديوات ديال شباب حارگین‌ثارو الجدل فوسائل التواصل الاجتماعي و قبل منهم قريت خبر على ناس حاولو يحرگو من كازا و من موراهم شفت فيديو ديال شباب وقفات عليهم باطيرا فالشمال و قالو ليهم يا الله تمشيو لسبانيا و طلعو بشورطاتهم فازگین‌ باش يمشيو بلا مايخمو …
عرفتي شناهي طلع بشورطك فازگ فباطو ماعرفتيش فين غايلوحك باش تهاجر ؟
عرفتي شناهي بنادم يحاول يحرگ من كازا ففلوكة ؟
هادشي راه لاكايعبر على شي حاجة راه كايعبر على قمة اليأس لي وصلو ليه بزاف ديال الناس و كايزيد يأكد على داك الاستياء لي كانشوفو شخصيا فوسائل التواصل الاجتماعي.
و بالمقابل كايخرج سي الخلفي و كايقولك ” لن نسمح بهجرة الشباب لأن المغرب يتوفر على فرص عمل هائلة”

سمع مني آ سي الخلفي الله يجازيك بيخير !

المشكل راه ماشي ففرص الشغل ! المغربي ديال اليوم مابقاش كايحرگ على ود طرف د الخبز فحال المغربي ديال شحال هادي ! مابقاش بنادم كايحرگ حيت مالقا ماياكل و لا مالقا خدمة ! هاد الجيل راه كايحرگ بحثا عن جودة حياة مزيانة ( عن كاليطي دوفي) ! و إلا علاش فنظرك كايهاجرو مئات المهندسين و الدكاترة و الأطر ؟
الجيل ديال اليوم مابغاش يخدم فلوزين بالسميگ و تتسمى وفرات ليه الحكومة فرص شغل ! الناس بغات تعيش ! بغات تلبس مزيان و تاكل مزيان و تسوگ‌ الطوموبيلات و تسكن فديور مزيانة ! راه جيل الايفون و النيتفليكس هذا آ سيموحمد ! تيليفون ساوي نص عام ديال الخدمة ديال سميكار  !  الشباب ديال هاد الوقت ماشي هوما الشباب ديال السبعينات و الثمانينات صحاب ” سكتو نباتو ” و ” قليل و مداوم و لا كتير و مقطوع ” و ” القناعة كنز لا يفنى” و دوك الامثلة لي الغرض منها الحد من طموح الانسان ! اليوم الناس بغات تعيش ! الشباب ديال اليوم كايقولولك بغاوه كثير ! و مداوم ! علاه مال دينمو مايكون كثير و مداوم ؟ راه كايشوفوه كثير و مداوم فبلايص اخرى فالكرة الارضية ! غا حنا لي غانعيشو ديما بالقطارة ؟

المشكل ماشي ففرص الشغل ! المشكل هوا انه ديك فرص الشغل ! لي غادي تعطيك صالير ! غادي تلقا راسك بزز منك خاسر داك الصالير كامل فخدمات لي خاص الدولة توفرها ليك ! حيت الدولة غاتفرعك فالضرائب ! و فالمقابل فاش غاتحتاجها نتا توفر ليك سبيطار فين داوا و مدرسة فين تقري ولادك ماغاتلقاهمش ! غايخصك تخلص الضرائب من جهة و تخرى الفلوس من جهة اخرى للقطاع الخاص ايوا ؟ ماشي قمة الظلم و التعدو ؟

راه غير هادي شي خمسطاشرعام كان لي بخدمتو فالمغرب ماكايهاجرش ! او قليل لي كايهاجر ! كان لي موظف مع الدولة كايقولك مستحيل نسمح فالوظيف ! كان لي خدام و عندو صالير ماكايفكرش بتاتا يهاجر ! و لا يحرگ ! دابا ولاو تا لي خدامين و وضعيتهم مستقرة نسبيا جزء مهم منهم باغين يمشيو

لاش غايصلاحو هاد فرص الشغل الهائلة ! لا ماكانوش غايضمنو ليا انا حياة هائلة ! و تطبيب هائل ! و تمدرس هائل ! و طرقان هائلة  و حياة هائلة فبلادي ! نعيش و نتمتع !

لاش غايصلاحو فرص الشغل الهائلة لا كنت غانعيش عيشة الكلاب ؟  لا كنت غانمشي للسبيطار و نتلاح فلاصال داطونط كي الكلبة و لا كنتي غانسيفط ولدي للمدرسة و يلقا راسو مع خمسين طفل مزاحمين كي الكلاب ؟

ايه المغرب فيه فرص شغل هائلة فالكابلاج و ليصونطر دابيل ! و لكن بشحال الكرا فكازا ؟ بشحال دايرة دار عادية للكرا فحي فحال سيدي معروف لي فيه فرص هائلة فالصونطر دابيلات ؟ ياك اقل بارطمة فاقل اقامة اقتصادية دايرة ربعالاف الاف درهم و لي هي اقل من الصالير ديال واحد خدام فصونطر دابيل ثمنية د السوايع فالنهار و هوا كايفرع فودنيه بالكاسك و مسمي راسو جاك بيغناغ !

و نزيدك ! راه حتى لي خدام اليوم فالمغرب ! جزء مهم منهم باغين يهاجرو ! و لي ماباغينش غاتلقاهم عندهم شي ظروف عائلية قاهرة لي حابسهاهم ! ناس خدامين ! مدراء و مهندسين و كادرات صحاح فالدولة و القطاع الخاص كايساينو غا الفرصة باش يعلقو ! باش يفرتحو ! و فاش كاتسولو علاش كايقوليك بغيت حياة بجودة احسن ! لاماكانتش ليا فعلى الاقل لولادي …
للمستقبل
…

و راهم دافعين الضواسا لكندا و ميريكان و كايقلبو فلينكدين على فرص عمل على برا …

و حتى انا شخصيا كمواطنة مغربية من الطبقة المتوسطة قارية و خدامة و حالتي المادية مستقرة و عندي عمل قار لاجاتني الفرصة نمشي من غدا ماغانزيدش نضرب فيها الضربة ! ماشي حيت كانموت بالجوع هنا ! بالعكس انا كاناكل مزيان هنا ! و كانعيش مزيان هنا ! و كانضرب تامارا على راسي كل نهار هنا باش نعيش مرتاحة…

ولكن المستقبل كايبان ليا فلو… ضباب !

و كانشوف راسي كانخلص ضرائب على مسائل ماكانستافدش منها شخصيا

راه اكثر من الثلت ديال وقتي و مجهودي البدني و الذهني كاديه ليا الدولة كل شهر على شكل ضرائب !

المشكل  آ سيموحمد ماشي مشكل فرص شغل هائلة

راه الناس باغا حياة هائلة.