اسماء غربي – كود//

خرج بلاغ مشترك ديال  وزارة الصحة ومنظمة الصحة العالمية، كيقول ان الوضعية الحالية بالمغرب “لا يجب بأي حال من الأحوال أن تثير قلق السكان”، وان منظومة مراقبة الأنفلونزا بالمغرب خدامة بشكل كامل وكتقدم گاع المعطيات الضرورية لاتخاذ تدابير الوقاية والتصدي، وحتى لدابا، لم يتم تسجيل أي ارتفاع غير طبيعي فحالات الإصابة بالأنفلونزا الموسمية فالبلاد.

حتى للهنا مزيان، ماكاين لاش نتخلعو وتوقع بسيكوز، الامور عادية، وحالات الاصابة مامرتافعاش… ولكن كيفاش لمغاربة وصل بيهم الحال مايصدقوش وزارة الصحة، ومايكتافيوش بمعطيتها، وتصريحاتها، وطلبو من منظمة الصحة العالمية تجي تشوف اش واقع وتخبرهم.

هادشي الى كيدل على شي حاجة فراه كيدل على انعدام الثقة اللي عند المواطن المغربي فحكومتو ووزارتو.

الوزير الدكالي ورئيس الحكومة العثماني ماخرجو يتفقدو السبيطارات حتى لايام من بعدما بداو الاصابات وبدات الناس كتموت، والدكالي اللي نورمالمون الدور ديالو كوزير يتواصل مع الشعب ويطمأنو، ماتواصل ماطمأن، خلا الناس وسط بسيكوز فين كلها كيلغي بلغاه، وفين طبعا “الفايك نيوز” كتنتاشر، وكنوليو عوض متوصلنا معلومات صحيحة ورسمية على الوضعية، كنسمعو ونقراو ان 100 ماتو، و200 مصابين…

والعثماني، جا يكحلها، عماها، نهار دوا على عدد الوفايات بال H1N1، كره لمغاربة بقلة الاعتبار اللي عبر بيها على الناس اللي ماتت.

لاش صالحة الحكومة والوزارة ايلى ما بقاتش الثقة بينها وبين المواطنين، راه هي اللي من المفترض تحميهم وتمثلهم وتواصل معاهم في اوقات بحال هادي، وماتخليش المغاربة عايشين في ابسيكوز، كيتسناو نوبتهم باش يموتو.