كود كازا //

بدموع مؤثرة، وجه الفنان كَاد المالح، خلال حلوله ضيفا على برنامج “رشيد شو”، مساء أمس الجمعة، رسالة إلى مربيته “لالة فاطمة” اللي رافقتو خلال طفولتو. كَاد قال بأنه من المؤكد كاتشوف فيه هاد السيدة دبا.

كَاد المالح وجه ليها رسالة، وقال فيها: “بغيت نقولها ماعمري نسيت داك الوقت مني كنت صغير.. كانت كاتكَلس معاي وكاتديني للمدرسة ونغني معاها.. هي أول وحدا تاقت فـ الحلم اللي كان عندي ديال التمثيل منين كنت صغير”.

وأضاف: “كانت كاتقول ليا نتا عفريت لكن غادي تولي فنان حقاش عندك داكشي ف القلب ديالك.. كانفكر فيها ديما وماغاديش نساها واليوم كانبوسها بزاف.. كانفكر فيها ديما وكانقولها كانبغيك”.

المالح، ف الحلقة ديال رشيد شو البارح الجمعة، هضر بالدارجة ديال البلاد. كاين عدد من المغاربة اللي عمرهم سمعوه كيهضر بها.. وخا كانو شي كلمات كيهربو ليه، عادي حيت ماموالفش بزاف يهضر بيها خصوصا فاش كيكون برا البلاد.. لكن الدارجة عندو حاضرة و بقا حريص يهضر بيها باش يفهموه كَاع لمغاربة اللي كيتبعوه بزاف.. حيت الدارجة هي اللي كتجمع لمغاربة كاملين.

ف هاد الحلقة قدم كَاد ذكريات من المسار ديالو الشخصي وحتى المهني، وجاوب على الأسلئة اللي ديال “رشيد العلالي”، وهضر على “التعريجة” اللّي كانت كتجيب ليه المربية ديالو ف كازا “لالة فاطمة” منين كان صغير.  وغيرها من الأمور اللي كشف عليهم و فسرهم بدارجة مغربية زوينة.