كود كازا ///
حسمت قيادات الاحرار والبام والاستقلال تقسيم رئاسة الجهات 12 وكبريات المدن. هاد الحسم مؤشر على ان البام داخل للحكومة ديال عزيز اخنوش.
فحزب التجمع الوطني للاحرار وفق مصادر “كود”٬ خدا جهة اكادير سوس ماسة وغادي يرأسها اشكلي عادل وجهة الداخلة وادي الذهب غادي ياخذها حرمة الله وجهة فاس مكناس غادي ياخدها شي حد من الحمامة وجهة تافيلالت غادي ياخدها ولد شباعتو وجهة طنجة تطوان الحسيمة اللي غادي ياخدها مورو.
فيما خدا التراكتور وفق مصادر “كود” جهة الرباط فشخص رشيد العبدي والجهة الشرقية للي غادية تبقى عند بعيوي وجهة مراكش تانسيفت للي غادية تبقى عند احمد اخشيشن وجهة بني ملال اللي غادي ياخدها عادل بركات.
فيما حزب الاستقلال غادي ياخد جهة الدار البيضاء فشخص القادري وجهة العيون فشخص حمدي ولد الرشيد =حمدي الصغير= فيما مازال ما تحسماتش جهة كليميم وادي نون. مازال فيها نقاش بين البام اللي باغي يعطيها لعبد الوهاب بلفقيه والاحرار للي باغي يعطيها لمباركة بوعيدة.
طبعا الجهات غير جزء من هاد الاتفاق الثلاثي. حقاش كاين عمدات المدن. فاكادير غادي ياخدها عزيز اخنوش رئيس التجمع. نفس الحزب غادي ياخد الدار البيضاء فشخص نبيلة ارميلي والرباط فشخص اسماء اغلالو فيما المسلاوي من نفس الحزب يمكن خدا عمدة فاس٬ فيما غادي ياخد عمدة مراكش البامية فاطمة الزهراء المنصوري. التراكتور غادي ياخد عمودية طنجة فشخص عبد اللطيف الغلبزوري ومدينة الداخلة اللي ممكن تاخدها عزوها الشكاف.
فيما الاستقلال غادي يحتافظ بالعيون من خلال حمدي ولد الرشيد ووجدة من خلال احجيرة.
طبعا الاتفاق فيه كاع المدن اللي عند هاد الثلاثي الاغلبية
