كود الرباط//

الانتخابات غايكونو ف وقتهم ومغاديش يتأجلو، حسب ما لمح به نور الدين بوطيب الوزير المنتدب لدى وزير الداخلية، اليوم في لقاء الداخلية بمجلس النواب.

بوطيب قال اليوم بصريح العبارة بلي الداخلية مركزة دبا على الاعداد للانتخابات.

الداخلية من معركة الحجر الصحي ودارت خدمة كبيرة الى جانب الاطقم الطبية والامن والدرك والقوات المسلحة والوقاية المدنية، باش يواجهو انتشار فيروس كورونا، اليوم غادخل لمعركة جديدة ديال توجاد للانتخابات، خدمة كبيرة كتسنا الاطر ديالها باش يكون اعداد جيد.

التسخينات بين الاحزاب السياسية تا هي بدات، تسريبات من هنا ولهيه، ضربات متتالية، شفنا بين البي جي دي وخصومه، بين الاحرار والبام، معارك بانت قوتها ف قانون تكميم الافواه 22.20 لي كلا فيها الاتحاد العصا وموراها قضية cnss لي كلا فيها البيجيدي العصا، ودبا الطالبي العلمي على قضية 250 مليون.

لكن مصادر مسؤول كتقول بلي التخوف الكبير هو استمرار العزوف وارتفاع نسبة المقاطعة للعملية الانتخابية وخصوصا فهاد الظروف الصعبة ديال تأثيرات كورونا.

انتخابات ما بعد كورونا، اكيد غاتكون استثنائية.