الرئيسية > آراء > كيفاش كيعطيك دماغك أنك تشوف قبالتك جوج سناكات عندهم تقريبا نفس المنتوج وجنبهم كزار داير البلانشة، وجنبهم شواية وبيناتهم محلبة وغير كينشو الذبان وتجي نتا وتزيد قبالتهم سناك واحد آخر، بلا حتى حاجة جديدة راه باينة غادي تخسر وغادي تسد وتبيع الماتريال
13/01/2022 18:00 آراء

كيفاش كيعطيك دماغك أنك تشوف قبالتك جوج سناكات عندهم تقريبا نفس المنتوج وجنبهم كزار داير البلانشة، وجنبهم شواية وبيناتهم محلبة وغير كينشو الذبان وتجي نتا وتزيد قبالتهم سناك واحد آخر، بلا حتى حاجة جديدة راه باينة غادي تخسر وغادي تسد وتبيع الماتريال

كيفاش كيعطيك دماغك أنك تشوف قبالتك جوج سناكات عندهم تقريبا نفس المنتوج وجنبهم كزار داير البلانشة، وجنبهم شواية وبيناتهم محلبة وغير كينشو الذبان وتجي نتا وتزيد قبالتهم سناك واحد آخر، بلا حتى حاجة جديدة راه باينة غادي تخسر وغادي تسد وتبيع الماتريال

محمد سقراط-كود///

كتلقى شي مول الزريعة خدام فشي قنت وتعرف ودار كليان، شوية كيجي واحد يحل جنبو من بعد واحد آخر كيحل قبالتو حتى ماكيبقى تاواحد فيهم خدام، نفس شي مع المحلبة والقهوة ولافاج والسناك، غير كيبدى شيل افاج في الحومة ويخدم كيتبعوه تلاتين كتدوز واحد العامين كيبدى السدان حتى كيبقاو غير دوك الحرايفية نيت، وغير دوك العيالات لي كيحلو كاراج ويديرو فيه فران ويبداو يقادو الخبز والحلويات حتى هوما غير تحل وحدة يتبعوها لخريين، حقا كل واحد ورزقو والمنافسة مزيانة للشاري الثمن كينقص والجودة كتطلع، ولكن السؤال هو علاش مكاينش إبداع وأفكار جديدة في المشاريع الصغيرة، كاين غير الحضية والمعاندة وفي اللخر كولشي كيولي مهرس عوض رابحين، شد أي حومة جديدة وراقبها شي عامين أو كثر وحسب شحال من بقال لي فتح جديد ودوز مدة قصيرة وعاود سد، وكذلك شحال من مخبزة ومحلبة ولافاج وقهوة، كتلقى نفس الكاراج كيحل فيه سناك كيدوز شوية كيسد، كيجي واحد آخر ويبدل ليه الصباغة ويزوقوا ويعاود يحل ولكن بنفس المنتوج العبيط لا تجديد فاست فود وبنفس الثمن وبنفس الردائة وبلا جودة ومع ذلك كيكون عندو أمل ويقين أنه غادي يطفرو وطبعا كيعاود يسد لأنه ماجاب حتى شي جديد.

في بداية الألفينات فاش بداو القهاوي الكبار كينتاشرو في المغرب خصوصا طنجة مراكش كازا كانو الناس كيقولوا هادشي تبييض الأموال ومنعرف شنو، ولكن حاليا هاد الطريقة الفيروسية ديال إنتشار السناكات آشمن تبييض غادي يكون فيها باش يبررها من غير غباء صحابها وضيق الأفق ديالهم، طبعا الإنسان راه كيفرح فاش كيشوف شباب دارو مشروع ونجح ليهم وتحركات معاهم القضية، ولكن فاش كتشوفهم دارو مشروع باين غادي يفشل من النهار اللول هنا راه كيبقاو فيك، وكنحاول نفهم حتى العقلية ديالهم كي دايرة، كيفاش كيعطيك دماغك أنك تشوف قبالتك في الجهة لخرى جوج سناكات حالين عندهم تقريبا نفس المنتوج وجنبهم كزار داير البلانشة، وجنبهم شواية وبيناتهم محلبة، وتجي نتا وتزيد قبالتهم سناك واحد آخر، بلا حتى ماتجيب حتى حاجة جديدة راه باينة غادي تخسر وغادي تسد وتبيع الماتريال.

حقا كاين الحرايفية لي كيشدو المحال يكون مردوم خاص غير يكون في الموقع ويخدموه مزيان ويكبروه ويديرو منو الفلوس، ولكن هادو راه قلال حيت هادو حرايفية وفنانة وكيجيبو حاجة جديدة، حنا نيت كان عندنا حانوت وعطيناه لواحد دار فيه سناك خدم شوية ولكن مازططش، من بعد شدو واحد آخر حرايفي ديال بصح بنفس الماتريال ونفس الموقع ولكن الإظافة كانت هي واحد التخليطة عندو فيها شي عطرية خاصة والشحمة وبيها كيصاوب الطورطية خونا خدم مخير ودار الدار والطوموبيل غير من داك المحال ولكن كيخدم ليل ونهار وعندو قالبو، أما الأغلبية راه غير الحضية والمعاندة وإنعدام الإبداع والتفكير وبحال الى تالفة بيهم الوقت وكيديرو غير الساهلة، كتلقى زنقة مكتخرجش ماكتدوز عمال ماجات حدا شي سونطردابيل أو إدارة أو مدرسة كبيرة، وا والو فقط حومة كيجيو الناس ينعسو فيها بالعشية وفي الصباح يمشيو لخدمتهم مكيدوزو حتى من حداه يشوفو آش عندو وكيحل فيها سناك ويدير صفحة في الفايس والإفتتاح بالدقايقية بحال الى غادي يكون عند وشي منتوج أول مرة في المغرب، في اللخر كتلقى عندوا لفريت والدجاج في العيش مسميهم تاكوس وصوص بيغي، ويقول حتى هو جربنا ولكن البلاد معطتناش.

موضوعات أخرى

29/03/2024 14:30

ها المعقول..استثمار صيني كبير فالمغرب بـ3 مليار درهم لانتاج بطاريات السيارات الكهربائية غايوفر 2500 منصب شغل وبلادنا هربات على لالجيري فصناعة السيارات

29/03/2024 14:00

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 13:45

تفاصيل حصرية على وضع منسقة جهوية لحزب سياسي بجهة فاس مكناس فالحراسة النظرية: خدات من الضحايا فلوس صحيحة وصلات 18 مليون والمدير الجهوي ديال الضرائب هو اللي فضحها

29/03/2024 13:30

الجيش الإسباني غاد يوسع المنشأت العسكرية ف سبتة ومليلية وغيجهز مراكز خاصة للتدريبات والمناورات لسلاح المدرعات

29/03/2024 13:20

تفاصيل اعتداء فرنساوي من أصول جزائية على مغربي فطنجة: مول الفعلة تقدم مع مرا فرنسية للنيابة العامة

29/03/2024 13:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟

29/03/2024 12:30

السلطات المغربية قبلات العودة ديالهم.. گاع الحراگة اللي استغلو الموڤيطا ديال الثلاثاء الفايت وحرگو لسبتة رجعو