كود الداخلة ////

كيفاش تضحك على كلشي وتخلي كلشي كيخدمك. من الوزير حتى الوالي. كلهم كيخدموك ويتسخرو ليه. هادي كديرها ليلى اوعشي اللي باغية صحة تولي ملكة الداخلة ماشي لمدينة بل لوطيلات اللي حدا الداخلة اتيتود. اوعشي دارت مسابقة غبية اسمها “صحراوية”. طبعا بالاسم غاديين تعرفو باللي استغلال وقح لقضية الصحراء من وحدة ما عندها علاقة بالصحرا.

نبداو بفضايح هاد المسابقة. قالو راه عندهم طبيب يرافق المشاركات وفق ما نقلته مشاركة ل”كود”٬ فجابو ليهم فرملي كيدور كاع النهار بدواه فصاكو. هاد الشي علاش وحدة شداتها كريز عوض يشوفها طبيب ديال بصاح قراو عليها القرآن. وحدة اخرى غيبات جاو عندها كيقولو ليها تنفسي بعمق.

هاد الشي ماشي مهم بزاف بزاف. المهم كان افتتاح اوطيل نهار الجمعة. الافتتاح حضر ليه والي الداخلة وكاتبة الدولة المكلفة بالسياحة لمياء بوطالب. واييه بجوج ظاهريا جاو يدعمو السياحة. لفضيحة ان هاد لوطيل ديال ليلى اوعشي. اي دارت حدث باش تفتاتح اوطيلها وتجيب الدولة لهاد الافتتاح اللي دار الجمعة. قالت ليهم اوطيل دو لوكس اسمه “لاكريگ”. وقالت باللي غادية تفتاتح اوطيل اخر. جابت وسائل الاعلام العمومية باش تسوق مشاريعها. واش هادي دولة تخلي ملف الصحرا بيد بحال هادي. بالسيف اولاد التراب يطلع ليهم الدم. وتقولو علاش كاين المد الانفصالي.

دابا غدا ايلى ناضت فالداخلة كيف هادي سنوات وجيبو ليهم لالة اوعشي تحل المشكلة. راه مشكلة الصحرا جاية من بحال هادو. ما عندهم علاقة بالمنطقة كيجيو يديرو لفلوس وكلشي اللي فالسلطة كيدعمهم وباش توقع شي مشكلة كيكونو اول واحد يهرب. شوفو غير شكون كيخدم فهاد لوطيلات فهاد المشاريع غاديين تعرفو باللي هاد الشي مبني على اساس ضعيف.