كود كازا ///

لخميس اللي فات دار كمال لحلو مول مجموعة “ليزيديسيون دي لا گازيت” و”ام اف ام” اجتماع باش يحيي الفيدرالية المغربية للاعلام. طبعا بقى رئيسها الابدي. تصورو كمال لحلو اللي كان كيدير معلق رياضي فماتشات الاسود فالثمانينات وتشهر بتعليقاتو فماتشات المغرب ضد الكوت ديفوار باش كيلعب فيها فوفانا٬ مازال حالف لا قبل من غير يكون رئيس.

اولا هاد الاحياء دارو وكان بوحدو المرشح وقرر انو يدمج “الجمعية المغربية للإذاعات والتلفزات المستقلة” داخل الفدرالية المغربية للإعلام العضو في المجلس الإداري للاتحاد العام لمقاولات المغرب. حسب مصدر ل”كود” فهاد الشي كولو عندو علاقة بشي دعم من الكاف فيه شي 5 مليون درهم.

اعضاء سابقين فهاد الجمعية اكدو ل”كود” باللي هاد الاجتماع دار بدون حضور الاعضاء المؤسسين والمنخرطين من الناشرين. مصدر اخر تساءل “فين نائب الرئيس وفين الكاتب العام وفين امين المال” واضاف “وفين حتى اموال الدعم اللي بقات فالفيدرالية قبل حلها واندماجها فالجمعية”.

فبيان الجمع العام الاخير للجمعية فيه تمت المصادقة أيضا، على التقريرين الأدبي والمالي للفدرالية واستعراض الأنشطة المنجزة خلال الولاية السابقة، والمكاسب التي تم تحقيقها، وبحث أهم المشاكل المطروحة حاليا، وسبل معالجتها في المراحل المقبلة من خلال طرح الأولويات المستعجلة”.

المصيبة ان هاد الشي دارو بعد ما علن هو عن حل هاد الجمعية قبل ما يلتاحق بالجمعية الوطنية للاعلام والناشرين يوم لاربعا 24 يونيو 2020.

لحلو عندو منصب رئيس شرفي فالجمعية اللي كيرأسها دلمي.

من غير هاد الشي احياء لحلو لجمعية لعبات لعب خايب مع الامارات العربية المتحدة ومدخلة معاها شي وحدين ما عندهم علاقة بالنشر بحال هاداك اللي كان خدام فسفارة الامارات٬ غادية دير مشاكل بين الناشرين والباطرونا. حقاش ديما لا فيدرالية الناشرين ولا الجمعية الوطنية للاعلام والناشرين قابلين انهم يكونو جزء من الباطرونا. كمال لحلو حالف حتى يكون فرع منهم باش يبقى حدا لملايرية.

احسن ما يدير لحلو اللي وصل لسن متقدمة هو يمشي يخسر لفلوس للي جمع. باراكا عليه