كود هناء ابو علي ///

يوم الخميس 26 مارس كانت رسالة لشكيب لعلج رئيس الباطرونا على تصرفات الابناك اللي خلو بالتزاماتهم مع هاد الجايحة. لعلج حذر من توقيف مجموعة من التسهيلات اللي كانت كتقدم للمقاولات. 

 بعد 24 ساعة رد المجموعة المهنية لبنوك المغرب اللي كيرأسو صوريا وصافي عثمان بنجلون واللي كيقرر هو محمد الكتاني. هو نيت وقع مع بنجلون هاد البيان. 

دافع هاد التجمع على راسو ورفض مضامين الرسالة ومشى واعتابر هاد الشي ما عندوش شي ساس.
“كود” اتصلت باحد اعضاء الباطرونا رجل اعمال معروف واكد باللي الابناك بصاح خلات بمسؤولياتها. المصدر قال ل”كود” باللي كانت مقاولات كيستافدو من تسهيلات فحدود 500 الف درهم تقلصات للنص مع “كورونا” واللي كانت كتسافد من تسهيلات فحدود مليون درهم رجعوها ل500 الف درهم. المصدر اضاف ل”كود” “واش هادا وقت ينقصو التسهيلات للنص”

رجل اعمال اخر اكد ل”كود” باللي كاين مشكل اخر بالاضافة الى التسهيلات “عندنا موظفين واخدين كريديات باش يشريو ديورهم. ابناك بداو يتلاعبو معاهم وقالو ليهم غاديين ناجلو لخلاص ماشي هاد الشهر حتى لشهر ابريل وخلاو لانتيري. هاد الشي ضد اللي قالو بنك المغرب. 

واحد التسجيل صوتي لرجل اعمال كيهدر باللي المقاولات مع تصرفات الابناك الجشعة غادية٬ تسد. رجل اعمال ثالث قال ل”كود” حنا باغيين الابناك دير لينا كيف دارت تركيا مع المقاولات. راه ايلى ما تحركاتش هاد الابناك غاديين نلقاو شركات كثيرة تعلن على افلاسها وازمة كبيرة اجتماعية غادية تبان “راه خايفين نجربو على المستخدمين والعمال”. المصدر نفسه زاد ل”كود” “كيفاش الدولة بكاع اجهزتها خدامة مزيان وهاد القطاع البنكي غادي يخسر هاد الهبة ديال لمغاربة”.

هاد المصدر قال ل”كود” “بنك المغرب موحالش يسمع منو حد. بغينا الملك محمد السادس يدخل”. 
لفضيحة ان الملك يالله هادي قل من شهرين بالضبط 29 يناير 2020 كان تقدم ليه “البرنامج المندمج لدعم وتمويل المقاولات” فيه ان القطاع البنكي يطبق معدلات فائدة جد منخفضة. هاد الشي وقعاتو المجموعة المهنية لبنوك المغرب مع وزارة المالبة وبنك لمغرب.
 
فيا باللي غادي يطبق “أدنى معدل فائدة بالمغرب” وانو جا بعد خلال الاستقبال الذي جرى يوم 27 يناير 2020 ،عبر الملك عن رغبته القوية في ألا يتجاوز معدل الفائدة البنكية 2 في المائة ،حتى يكون هذا البرنامج واقعيا وينعكس إيجابا على الساكنة والفئات المستهدفة” واكد البيان انه استجابة لرغبة الملك “حدد القطاع البنكي ،في سقف 2 في المائة، معدل الفائدة الذي سيطبق على المستفيدين” واضاف “بخصوص العالم القروي، سيكون السقف في حدود 1,75 في المائة، مما سيتيح بروزا أسرع لطبقة متوسطة قروية”.

واوضح البيان ان الملك قال بان “يضع صندوق الحسن الثاني ،رهن إشارة “صندوق دعم تمويل المبادرة المقاولاتية”، غلافا ماليا بقيمة ملياري درهم بدون فائدة” وان “هذا المعدل موجه للعالم القروي، أي ربع المبلغ الإجمالي للصندوق، من أجل الحصول على معدلات جد تفضيلية لهذه الشريحة”.

دابا بعد شهرين هاد التجمع قلب وجهو. ووقتاش. وقت الجايحة. الاستثناء الوحيد لحد الان فهاد البنوك هو القرض الفلاحي. غاديين نشرحو ليكم من بعد اش دار وكيفاش طلع بنك فيه الوطنية وكيهمو امن لمغاربة فهاد الفترة لمقودة