كود احمد الطيب ////
ناصر بوريطة وزير الخارجية والتعاون الدولي كاره النساء اللي فيدهم غادي بالخارجية للحيط. غادي بالديبلوماسية للحيط. تصورو هاد لوزير غادي ويحس براسو اكثر وفهاد الفترة خدمتو قللات وشوهاتو كثرات.
هنا ما نهدروش على مشكلتو مع النساء اللي فيهم فقط بل على اسلوب هاد الرجل اللي كيبان باللي الكسوة ديال الديبلوماسية غادية وتكبر عليه.
وزير خارجية المغرب تبع اسلوب انا ندير كلشي. ما محتاج لحتى شي مدير. بوريطة خدام فوزارة هادي مدة بلا كاتب عام. من الفترة اللي تعين فيها الازرق سفيرا للمغرب فتركيا ومنصب الكاتب العام لوزارة الخارجية خاوي. بوريطة اللي كان كاتب عام توحش المنصب ودابا باغي يبقى المنصب خاوي.
بوريطة كاره النساء ديما كان هو المكلف بالتواصل فالوزارة. مديرية التواصل ما عمرو عتارف بيها. ما كيعتارفش بالكفاءة. لانو واخا كيكون كونكور وكينجحو فيه وايلى هاد لوزير ما رضاش عليهم ما يتمش تعيينهم. حتى لو عينو غادي يلقى الفرصة يسالي معاهم.
دابا باش كان الوزير المنتدب المكلف بالجالية عبد الكريم بنعتيق كان بوريطة يخاف يقرب منو. غير مشى وجات هاد الوافي اللي ما فيدهاش واللي ضعيفة بحال رئيس الحكومة اللي من حزبها٬ قرر هاد لوزير اللي عين خوه رجل ثاني فسفارة المغرب ببيرن٬ يتحكم فهاد الوزارة. دابا داير بيها ما بغى
دابا بوريطة ولى خالق احتقان فهاد الوزارة. مدراء بعض المديريات ما عندهمش معاه. ما عندهمش مع تصرفاتو. هما كيشوفو كيفاش تعامل مع اللي كانو مسؤولين عليه. صلاح الدين مزوار وزير الخارجية السابق كان هو الشاف ديال بوريطة. لكن هاد بوريطة بالحقد اللي فقلبو ما قدرش ينسى امور كثيرة. نهار مزوار هدر على الجزائر وجاتو تقليقة من الفوق بان معدن ولد تاونات. خرج بيان فيه من الخسة والوضاعة اللي ما عمر وزارة الخارجية دارتو مع الاعداء ما بالك مع وزير سابق.
هاد الشي عندو علاقة بالبيانات اللي ولات تخرج اخيرا باسم الديبلوماسية. كيفاش كتسمى الديبلوماسية ولغتها متشنجة. هاد التشنج ما بقاش غير مع مزوار بل حتى مع دولة صديقة بحال المانيا. بعد مؤتمر برلين حول ليبيا كان تصرف بوريطة غير الديبلوماسي باش سب المانيا. النتيحة هو ان برلمانها طالب الدولة بصلاحيات اكثر فالصحرا. اييه يدخلوك من الصحرا يدمرو المغرب ويضروه. هاداك البيان ديال بوريطة راه ضد مصالح المغرب العليا. لان فيه ضرر لهاد المصالح. واش كاين شي ديبلوماسي عاقل غادي يفتح مواجهة مجانية مع المانيا على قضية ليبيا. راه الحماق هادا.
بوريطة دابا ما بقى ينسق مع حد من غير ولي نعمتو وصافي. اكيد علاقاتو ببعض اجهزة الدولة اليوم باردة. باردة حقاش ما كيهمو الا اللي كيعتاقد انو اليوم قوي.
