سهام البارودي – كود//
لحد الآن التلقيح اختياري فالمغرب و فحال بزاف ديال الدول عبر العالم فأوروبا و آسيا جواز التلقيح ضروري لولوج بعض المرافق العمومية و هادا اجراء من بين بزاف ديال الاجراءات لي الهدف ديالها حماية عباد الله من الوباء ! طبعا هاد الاجراء نقدرو نتافقو معاه او نختالفو معاه كيما واقع فالعالم كامل ! و من حق أي واحد يعبر على الرأي ديالو !
ولكن لي خطير هوا بنادم يبدا يهضر و جيب يا فم و گول باش ينشر افكار مغلوطة ! شكون قال للكتاني المتطرف بلي اللقاح خطير باش ينوض يكتبها فالفايسبوك بلا حشمة بلا حيا ؟ عندو شي دراسات ؟ دار شي ابحاث فداك اللابوراطوار لي فالڤيلا ديالو ؟ قاري الكتاني اصلا شي علم كايمكنو يقولينا واش اللقاح خطير و لا لا ؟ جينيتيسيان ؟ ميكروبيولوجيست ؟ اختصاصي فالجهاز المناعاتي ؟ آش دخل حمارتو للفروسية اصلا ؟
هاد التطاول على العلم لي كايمارسوه بعض المتطرفين لي دماغهم عامر بنظرية المؤامرة راه غير معقول ! مي نعيمة تشدات حيت شككات فكورونا فالوقت لي الدولة كانت دايرة مجهود كبير باش تقنع الناس انهم يحميو راسهم باتباع اجراءات السلامة ! و الكتاني حر طليق كاينشر لينا الافكار المسمومة ديالو ضد اليهود و ضد المرأة و ضد المفكرين و المثقفين بكل أريحية و دابا ضد اللقاح واخا هوا بينو و بين العلم و الميكروبيولوجيا و الايمينولوجيا مابين السما و الارض فالوقت لي الدولة كادير مجهود باش تقنع الناس باللقاح !