كود: محمود الركيبي العيون ///
فحوارو طويل مع “كود”، قال محمد ولد محمد سالم ولد الخليل “بريطانيا” المختطف السابق وأحد ضحايا سجن الرشيد بمخيمات تندوف، فقصة معاناتو مع جلادي الجبهة بأن المخابرات الجزائرية كانت يدها طويلة وهي السبب اعتقالو.
القصة بدات كيف حكاها ل”كود” فالثمانينات باش قطع مع صديقو عبد الرحمان خربوش من لعيون لاسبانيا عبر سبتة. باش وصلو لهاد الدولة كانو فالكوميسارية فسبتة ومن بعد فاليكانتي. اي ان السلطات الاسبانية عرفاتهم. فهاد المدينة اي اليكانتي غاديين يتلاقاو مع ناس القنصلية الجزائرية تماك بوساطة من صحراويين. الجزائر ومخابراتها غادية تتكلف بالفلوس باش ترسلهم لمدريد كيف اكد فحوارو مع “كود”٬ ومن بعد بوثيقة جزائرية غاديين يركبو فطيارة وكذبات المخابرات الجزائرية عليهم باش قالت ليهم قبل ما تمشيو تقراو فكوبا غاديين تمشيو من مدريد الى طرابلس عن طريق الجزائر٬ فاللخر وصلو لمطار الجزائر ونقلوهم لسجن الرشيد الرهيب اللي غادي يدوز فيه 7 سنين.
اسبانيا مسؤولة حقاش مشاو فطيارتها وخرجو من بلادها وكانت على علم بيهم. دابا راه بريطانيا” كيطالب السلطات الاسبانية تجبد ديك الوثائق للي سافرو بيها.
وأضاف “بريطانيا” لي كان كيتحدث لميكرو “كود” فحوار غادي يتنشر لاحقا، بأن المخابرات الجزائرية لاحقاتو، وطرحات عليه عدد من التهم حيث أنه فسنة 1988 وقعت حركة فمخيمات البوليساريو، وكان تابعوه ولصقولو عدد من التهم ومنها التخابر للمغرب.
مضيفا ذات المتحدث بأنه فالوقت لي كان كيتعذب فسجن الرشيد السيء الذكر، كانت المخابرات الجزائرية لي نسقات مع نظيرتها الإسبانية باش ايطيحوه كتكذب على عائلتو وخوه وتقولهم بلي “محمد بريطانيا” راه كيقرى فروسيا.
وأضاف بأن الخبث لي زرعاتو المخابرات الجزائرية فالناس كان رهيب ومرعب، وبأنها توزع أسماء عدد من العائلات الصحراوية وأبنائهم ليتم اعتقالهم من طرف المليشيات المسلحة للبوليساريو.
حوار “كود” ضحية من ضحايا البوليساريو مع محمد ولد أحمد سالم السباعي “بريطانيا” غايتنشر ف”كود” فوقت لاحق.
