كود احمد الطيب ////

دار ادريس لشكر الكاتب الاول للاتحاد الاشتراكي خرجة هدر فيها علي القطبية المصطنعة. كيهدر فيها على حزب التجمع الوطني للاحرار والعدالة والتنمية.
علاش ا سي ادريس ماشي هاد اخنوش لي دخلك للحكومة وماشي هاد العثماني لي كتقول عليه حسن من بن كيران؟

اليوم ادريس بدل ما يعترف بلي تدبدب مواقفه وتغيير حلفاءه بين عشية وضحاها هو سبب فشل الاتحاد المستمر وان الناس وبفضل الثورة الاعلامية وتوفر المعلومة ما بقاش ممكن تنسى لك اخطاءك ويمشي يحط السوارت ها هو معول على الابتزاز والمناورة لي أبان عن فشله كلما لجأ إليهما. نسى باللي بفضل الاحرار حافظ على فريقو فمجلس النواب. واييه.

اللي كيعرف لشكر غادي يعرف باللي حوارو مع “شوف تيفي” هدفو يناور. ديما كيقول الهدرة ويخلع بيها الدولة ويعطيوه شي حاجة. كلشي عاقل كيفاش ولى وزير هادي سنوات. غير جبد الوافد الجديد =البام= وهو ياخد كرسي فالحكومة.

اولا ما كانياش قطبية فالمغرب كاينة احزاب. ايلى كنتي فحزبك ناعس ما كدير والو مشكلتك هادي. راه البام بعلاتو كيتحرك. الاحرار كيتحرك. البي جي دي كيتحرك. التقدم والاشتراكية كيتحرك. حتى حد ما هدر على القطبية. انت كتضرب فحزب كلشي اللي وصل ليه الاتحاد بسباب هاد الحزب=الاحرار. وكون تحشم