كود اسماء غربي ///

دايرة من البارح لائحة كيروجوها شي وحدين على اساس انها لائحة الجورنالات اللي خداو الدعم العمومي. هاد اللائحة راها ماشي جديدة. راها ديال العام اللي فات.

الدعم هاد العام تبدل فصيغتو فكلشي ليه. اولا مازال ما تعطاش وثانيا ما غاديش يتعطى كيف كان.

راه وزير الثقافة والشباب والرياضة قالها بوضوح هادي قل من سيمانا. غادي يتعطى دعم فحدود 205 مليون درهم. فيها المطابع فيها شركة وحدة ديال التوزيع اللي هي سبريس” فيها الفواتير ديال الشركات الناشرة للصحف وفيها صاليرات 3 اشهر =يوليوز وغشت وشتنبر=

هاد الشي اذن اللي منشور غير كيطيحو الباطل وصافي

حقاش خاص المجلس الوزاري ينعاقد. ممكن يكون اليوم الثلاث. ويصادق على قانون المالية المعدل بسباب كورونا فيروس. بعدها يصادق على نفس القانون المجلس الحكومي. يترسل لمجلس النواب وخاصو يتناقش ويصادقو عليه وممكن يديرو شي تعديلات. يمشي لمجلس المستشارين وحتى هو خاصو يصادق عليه. يرجع لمجلس النواب عاد من بعد كل قطاع ياخد اللي جاه من الميزانية وبعدها يمشي هاداك اللي مخصص للصحافة اي هاديك 205 مليون درهم ايلى ما وقع فيها حتى شي تعديل

هاد الشي يقدر يحتاج 15 يوم على الاقل باش يدار.