البارح السبت، كان واحد السيد راكب فطوموبيل ميرسيديس وزربان باغي يوصل واحد البنت يالاه جات لمحطة التران فمراكش، وما بغا حتى واحد يعطلو لدرجة تكرفس على واحد السيد حيت واقف فالسطوب.

القضية تطورات بسرعة من بعد ما بدا مول السيارة لي كيقول على راسو مهم وخدام في وزارة الداخلية، كيتهكم على السيد لي واقف فالسطوب وكيعيب فكلام المراكشيين، الشي لي خلا الطرح يسخن بيناتهوم، حيت خرج السيد لي عند راسو “مهم” وشنق على الاخر وبدا يبهدل فيه قدام البوليس، ومخرج عينه كيقول انو من وزارة الداخلية، ومن جهة لفتيت باش يبعدو منو البوليس.

وفوق هادشي هاد الشخص من بعد ما دار الفوضى وتكرفس علي السيد ركب فالطوموبيل ديالو وزاد مع الطريق بسرعة كبيرة، بحال ايلا البوليس لي وقفوا عليهم غير كومبارس، الشي لي خلا الضحية يحتج ويمشي يشكي فولاية الامن، ويعطيهم رقم السيارة ديال السيد لي كيقول من الداخلية، بحال ايلا زعما الداخلية كتشجع على خرق القانون، وكتحمي الفوضويين لي خدامين فيها؟.