كود العيون //

بعض النشطاء والصفحات التابعة لأذرع جبهة البوليساريو وموقع عملها من الجزاير، كيروجو لخبر كلو كذوب، بلي الصبليون بدلات موقفها من قضية الصحرا وغادي تعلن عليه قريب.

وأضاف النشطاء لي خدامين مع جهات فالبوليساريو، وكيروجو مغالطات كبيرة كيبيعوا بيها الوهم لساكنة المخيمات وشي ناس من الإنفصاليين، بلي اسبانيا تقاضى ليها الصبر مع المغرب وبأن بيدرو سانشيز تعرض لضغوطات كبيرة من طرف الأحزاب الإسبانية وغادي يرضخ ليهم وبالتالي غادي يرجع موقف الصبليون لنقطة البداية.

وزادت هاد الجهات قالت بلي الحكومة الإسبانية بزعامة بيدرو سانشيز، طلبات لقاء الرئيس الجزائري عبد المجيد تبون فالقريب العاجل، وخلالو غادي يعلن سانشيز على عودة الصبليون لقرارها التاريخي والدائم حسبهم فقضية الصحرا، والتخلي عن دعم مبادرة الحكم الذاتي.

بطبيعة الحال هاد الخبار الزائفة، كتروجها بعض الجهات والأذرع التابعة للبوليساريو لي كتتلقى الدعم من الجزاير والقيادة فالرابوني، باش تزرع شويا ديال الحماس للساكنة ديال تندوف المغلوب على أمرها.