سهام البارودي – كود//
مصيبة مع بعض الآباء المغاربة لي يصحابهم راه الأولاد لعبة ! غير آجي وولد و راه المدرسة غاتشدو و المعلم غايقريه و يربيه و الدولة غاتصرف عليه و تخدمو ليك! امهات كايغوتو فالواتساب واك واك مابقيناش قادين ! عتقونا شدو علينا ولادنا! الاحتجاجات فبيبان المدارس ملي سمعو التعليم عن بعد ! كيفاش التعليم عن بعد ؟! و كيفاش غانديرو نقريو ولادنا عن بعد و احنا اصلا ماقارينش؟! صافي بنادم ولا كايسمع التعليم عن بعد و كايخرا فسروالو ماكرهش يسيفط ولدو بزز للمدرسة واخا يجيه الطاعون ماشي غي كورونا!
نهار قاليهم الوزير عندكم الاختيار بين التعليم الحضوري و التعليم عن بعد قاليك كيفاش الاختيار و علاش تعطيونا الاختيار ؟ شوف الحماق ديال شي آباء كي داير ! حتى باش ياخدو قرار كايهم مستقبل ولادهم و يتحملو مسؤوليتو ماقادينش باغين الدولة تهنيهم و تاخد القرار بلاصتهم باش تتحمل هي المسؤولية من بعد ! واش كاين شي تملص من المسؤولية اكثر من هذا ؟
علاه كان كايصحابكم غير آجي وولد الولاد ؟ باغي تساهم فداك الدري غي بحيوان منوي و نتي باغا تساهمي غا بالبويضة؟ كاتجيكم ساهلة تحلو رجليكم و تبلزوهم و صعيبة بزاف تربيهم و تقريهم و تساير معاهم ! للاسف بزاف د الآباء المغاربة مهملين و مقصرين بزاف فالدور ديالهم كآباء! لا فلوس باش يوفرو للدري حياة كريمة ! لا قراية باش يعرفو يسايرو معاه فالتعليم عن بعد ! لا تربية باش يعرفو يربيوه و يضبطوه و يجلسوه حداهم ! والو ! بنادم والد الولاد بلا تخطيط بلا مولاي بيه و عوال على الدولة و الزنقة و المدرسة يتكلفو ليه بيه! و باش هوا ولدك و باش نتا باه ؟! بقات فالسميات ” نهال” ” فارس” “مهند” “اوسفوناء” كايطيرو المساخيط فالسميات ! راه الاولاد مسؤولية مادية و معنوية نتوما العام لي جا كايلقاكم والدين الاولاد كنوع من التسلية ! ماكاين مايدار آجي نولدو شي وليد و لا شي بنيتة يونسنا و يخدم علينا فاش نكبرو و الفلوس ؟ و المستقبل ؟ و القراية ؟ و المصروف؟! و الدار ؟! و التربية ؟ هادشي ماكاتسولوش فيه حيت كاتخباو ورا ديك ” كولا يتزاد برزقو” وا ها كورونا جات ! لگاو دابا داك الرزق لي كنتو كاتسناو!
و ماتنساوش بلي هادوك الولاد لي نتوما ماقادينش عليهم دابا هوما لي كنتو كاتسيفطوهم للمعلم يقريهم و يربيهم و نهار يغوت ليك على الولد تجي تقوليه ماتغوتش ليا على ولدي ! نتا لي ولدتيه و ماقادش عليه و باغي المعلم يقد عليه و يصنع منو مواطن صالح ؟ علاش فيناهوا الدور د الاسرة ؟! حيت انا وليت كانشوف بزاف د الاسر فاشلة حتى فضبط اطفالها فما بالك بأنها تقريهم و تساير معاهم!
للأسف بزاف ديال الواليدين كايعتابرو المدرسة حضانة ! كايسيفطو ليها الاولاد باش يتهناو منهم ! يصحابهم راه التربية هي تقول لولدك ” سير للمدرسة” و تلوحو للمدرسة فحالا المدرسة بوحدها غادي تخلق ليك المعجزة! آ سمع آ سي ! آ و الله و ماكنتي سيدي و مولاي لا قراو ولادك و ترباو و كانو مواطنين صالحين ينفعوك و ينفعو المجتمع !
وا بقا نتا تبكي ” مابغيناش التعليم عن بعد” ! هوا لي كاين ليماك هاد الساعة وا تحمل مسؤوليتك و كون راجل و ذنوب ولادك راهم عليك ! ماتلصقهم لا فكورونا لا فالدولة ! نتا لي ولدتيه ! نتا لي تقد بيه!
كون كانت لاسيسطونط سوسيال فالمغرب فحال اوروبا كوراه النص ديال اطفال المغاربة محيدينهم لواليديهم و كايعيشو فالخيريات بقوة الاهمال و الاستهتار و انعدام المسؤولية لي كايعيشو فيها الاسر المغربية.