عفراء علوي محمدي- كود//

كورونا وصل للوطيلات فمنطقة الوالدية بإقليم سيدي بنور، بحيث عرفات “كود” من مصدر محلي أن واحد الموظف فوطيل بالمدينة تقاس بالفيروس، بينما خرجات نتائج 5 مخالطين لسيدة مصابة فأوطيل آخر إيجابية.

وفتوضيحو ل”كود”، قال عز الدين لمنوني، مندوب الصحة بإقليم سيدي بنور، أنه تم وضع جميع المخالطين ديال الموظف اللي بانت إصابتو اليوم فالحجر الصحي علاما يخرجو التحاليل ديالهم، “أما بالنسبة للحالات الخمس الأخرى فماعندهاش علاقة بالوطيل اللي خدامة فيه المصابة الأولى، واللي كانت بانت إصابتها هذ أيام اللي فاتو، بل كيتعلق الأمر غير بناس من عائلتها”.

وكشف المنوني أن لوطيل اللي تكتشفات فيه إصابة هذ الموظف تم إغلاقو مؤقتا، وهو نفس الإجراء اللي تم اتخاذو مع لوطيل لاخر.

وقال أن هذ الإصابات فلوطيلات فالواليدية بانو بعدما دارت المندوبية دالصحة حملة ديال الكشف على فيروس كورونا فالفنادق والمراكز السياحية، بعدما تفتحو فنادق وجا موسم الاصطياف.

وللإشارة، الإقليم سجل اليوم 11 حالة فالمجموع، 6 بالوالدية و 3 باثنين الغربية و2 بسيدي بنور.