عفراء علوي محمدي- كود//

مللي بدينا نسجلو ألف إصابة فالنهار والإصابات اليومية بالفيروس غادية وكتطلع، واليوم وصلنا ل2853 إصابة فظرف 24 ساعة، ومنهنا لعيد الكبير نقدرو نفوتو هذ الأرقام، فالوقت اللي المواطنين مابقاوش مسوقيل للتعقيم والتباعد والكمامات.

وحتى الإصابات الخطرة ارتفعات، بحيث ولاو عندنا 481 فأقسام الإنعاش، و102 تدهورات حالتهم غير اليوم.

واليوم ماتو 7، وفالمجموع ولاو 15253 اللي كيتعالجو.

وهذو التفاصيل:

التلقيح:

وتلقحو اليوم 27880 بالجرعة الأولى، ووصلو فالمجموع  ل11213841،  وخداو الجرعة الثانية 10840، ووصلو فالمجموع ل9619727.

الإصابات:

تقاسو اليوم 2853 واحد من أصل 23413 واحد دار التحليلة، ووصل عدد المصابين فالمجموع ل555488.

ومؤشر الإصابة التراكمي وصل ل1526 لكل 100 ألف نسمة، بمعدل 7,8 لكل 100 ألف نسمة فهذ 24 ساعة.

حالات الشفاء:

تشافاو اليوم 948، ووصل الإجمالي ل530801، بنسبة تعافي ديال 95,6 فالمية.

الوفيات:

واليوم ماتو 7، ووصل هكذا عدد الوفيات ل9434، بنسبة فتك 1,7 فالمية.

الحالات النشيطة والحرجة:

وعدد الحالات النشيطة طلع ل15253، وعدد الحالات الحرجة وصل ل481، 102 تدهورات غير اليوم، و15 تحت التنفس الصناعي الاختراقي، ووصلات نسبة ملء أسرة الإنعاش ل14,1.