عمـر المزيـن – كود بوينس آيرس///

كل واحد كيجي لدولة الأرجنتين غادي يحس باللي الشعب كولو مجنون على شي إسمها الكرة. شوارع العاصمة ديالها “بوينس آيرس” فيها التجارة بزايد ومني شافت “كود” لقات باللي هاد التجارة تقريبا كلها مبنية على الرياضة فزمن كتعيش فيه لبلاد كولها أزمة اقتصادية خانقة.

الجولات اللي دارت “كود” في أهم شوارع “بوينس آيرس” وقفت على انتشار كبير لمحلات بيع الملابس والحذاءات الرياضية. لحوايج الرياضة اللي مروجة كلها تقريبا ديال ليونيل ميسي اللي عاد لعب مع فرقتو ماتش أميكال ضد البنما.

موسيقى التانغو:

اللي كيجي للعاصمة ديال الأرجنتين ضروري كيفكر فستمتع بموسيقى “Tango” اللي كتكون مصاحبة لرقصات زوينة فيها الإبداع بزاف. هاد الابداع جاي من “بوينس آيرس والعاصمة ديال الأوروغواي ومونتيفيديو، ومن بعد عاد انتشر فالعالم.

الطلب على هاد النوع من الموسيقى كاين والأمكان اللي ليها مختلفة. بطبيعة الحال كاين لبلايص هاي كلاص وكاين أمكان متوسطة والأثمنة مختلفة من مكان لآخر. الطلب على عروض “Tango” خلاّ عدد من الوسطاء يديرو وكالات خاصة لهاد الغرض.

وسيطة كلسات معاها “كود” وشرحات نوع العروض. مثلا كاين قصارة للاستمتاع بهاد النوع من الموسيقى فيها الشراب ووسيلة النقل تجي مورا الزبون حتى للفندق وتساينو حتى يسالي الحفل ديالو، هاد الحفل فيه حتى الماكلة والشامباني والروج يبقا يشرب الواحد حتى يعيا.

فهاد الحفل فيه عروض فنية زوينة ديال موسيقى الطانغو. الدخول بطبيعة الحال خاص يكون فيه الحجز مسبقا وكولشي بالأسماء. المهم هاد الموسيقى محركة السياحة ديال الأرجنتين

مغاربة الأرجنتين:

لمغاربة اللي عايشين فالأرجنتين قلال بزاف. فحسب مصدر من السفارة هضرات معاه “كود” قال باللي مكاينش اكثر من 260 مغربي فلبلاد. وفيهم يهود مغاربة عايشين.

“كود” دارت جولات كثيرة في شوارع العاصمة الأرجنتينية لكن لمغاربة مباين ليهم آثر. لكن لقينا شي مغربي فواحد السوق شعبي كيتقضا واللي بعيد شويا على العاصمة وإسمو “حي La Boca”. هاد الحي يقابل التيران ديال لمدينة الصغير اللي كان كيجي ليه مارادونا ولعب فيه بزاف.

هاد المغربي اللي هضر معاها صدفة مني سمع صوت مغربي حداه. جا كيطير باش يسلم. حس بالفرحة وبمغربي حداه. إحساس كيجي لأي واحد كيحب بلادو والوطن ديالو والملك ديالو.

أغلب لمغاربة كيف عرفات “كود” متزوجين ودايرين مشاريع باش يعيشو. أغلبهم خدام فالتجارة. وكاين شي حد اللي يتحدر من قلعة السراغنة وداير مقهى فيها وجبات مغربية.

البحث عن قميص ميسي:

أي واحد كيجي لبوينس آيرس ولو خاصو يشري شي سوفونير للعائلة أو لصحابو. الجنون ديال الشعب على كرة دفع عدد من التجار من شحال هادي ماشي دبا طبعا باش يروجو للملابس الرياضية ديال نجوم الكرة الأرجنتينية، وأبرزهم دبا ليونيل ميسي اللي القميص ديالو اللي ماشي مدرّح كيكون غالي لكن كاين القميص لي مدرّح كيتباع بثمن طايح ومعروف كيفاش داير.

عدد من المحلات فوسط العاصمة كيبيعو قميص ميسي ماشي الدوريجين. وكاين شي محلات كيف شافت “كود” يقدر يطبع هو لقميص ويكتب فيه اللي بغا. المهم فهادشي هو القميص يتباع وفيه إسم “ميسي” ويكون ديال الفريق الأرجنتيني اللي خدا كاس العالم.

الجنس في بوينس آيرس:

البحث عن الجنس فالعاصمة الأرجنتينية ماشي صعيب لكن الصعوبة تتجلى فحاجة وحدا وهي اللغة. الصبليونية مصيطرة على معظم سكان المدينة والأرجنتين بشكل عام بصورة كبيرة لدرجة أنها احتلت المركز الرابع بين دول العالم من حيث نسبة التحدث بالإسبانية.

نرجعو لكيفاش كيخدمو بائعات الجنس. أغلبهن خدامين غير “عن بعد” وقليل فاش تلقا شي بائعة جنس تهضر معاك ف الزنقة.. كاين مواقع خاصة بهادشي على الأنترنت. السائح اللي كيجي وباغي هاد الخدمة ضروري كيدخل لهاد المواقع وبعدها يحصل على واتساب لبنت اللي عجابتو وداك الساعة كيكون التفاوض على شحال ديال الوقت تبقى معاه وشحال ديال لفلوس. هادي أول حاجة كتقولها بائعة الجنس.

مواطن من البرازيل هضرات معاه “كود” وقال باللي طلبات منو بائعة جنس 20 ألف Peso argentin للساعة الواحدة، والثمن يختلف طبعا مع شحال ديال الوقت تقدر تبقا معاه. ويختلف مع شكل عاملة الجنس وووو… هوما خدامات ديما 24/24.